Müxalifyönlü Azadlıq Partiyası oktyabrın 15-də keçiriləcək prezident seçkilərində iştirak etməklə bağlı qərarını dəyişib. Partiyanın mətbuat xidmətindən APA-ya daxil olan məlumata görə, Ali Məclisin bugünkü toplantısında prezident seçkilərində iştirak etməmək barədə qərar qəbul edilib. Azadlıq Partiyası digər müxalifət təşkilatlarının seçkilərə qatılmadığını, demokratik seçki mühitinin olmadığını əsas gətirərək bu addımı atıb.

Solçu Azərbaycan Sosial-Demokrat Partiyasının çərşənbə axşamı keçirilən iclasında prezident seçkilərində iştirakla bağlı yekun qərar vermək mümkün olmayıb. «Müzakirələrdən sonra belə qərara gəlindi ki, bu məsələ rayon təşkilatlarının müzakirəsinə verilsin. Beş gün ərzində rayon təşkilatlarında müzakirələr başa çatdırılacaq və Mərkəzi Plenum yekun qərarını verəcək», - bunu Mərkəzi Plenumun iclasından sonra Trend News-a ASDP sədri Araz Əlizadə bildirib.

Azərbaycanın Mərkəzi Seçki Komissiyası çərşənbə axşamı Azərbaycan prezidentliyinə beş namizədin səlahiyyətli nümayəndələrini təsdiqləyib.

Azərbaycanın Bütöv Xalq Cəbhəsi Partiyasının sədri Qüdrət Həsənquliyev, Ümid partiyasının sədri İqbal Ağazadə, Müasir Müsavat partiyasının sədri Hafiz Hacıyev, Azərbaycanın Liberal-Demokrat Partiyasının sədri Fuad Əliyev və Yaşıllar Partiyasının sədri Mais Güləliyevin MSK- dakı səlahiyyətli nümayəndələri təsdiq edilib.

Azərbaycanın Mərkəzi Seçki Komissiyası (MSK) ictimaiyyəti seçici siyahılarının dəqiqləşdirilməsində yaxından iştirak etməyə çağırıb.

«Seçici siyahılarının dəqiqləşdirilməsi səsvermə gününə qədər mümkün olacaq. Siyasi mövqeyindən asılı olmayaraq, hamı bu məsələdə aktiv olmalıdır» - çərşənbə axşamı jurnalistlərə MSK-nın sədri Məzahir Pənahov bildirib.

Azərbaycanın müxalif Açıq Cəmiyyət Partiyası (ACP) hesab edir ki, müxalif düşərgənin əksər partiyalarının prezident seçkilərində iştirakdan imtina qərarları seçkiqabağı şəraitlə bağlı deyil.

«Mən seçkiqabağı şəraitin demokratiki olmaması kimi bəyanatları bəhanə hesab edirəm. Azərbaycan müxalifətinin seçkiləri boykot etməsi əvvəlcədən düşünülməyib və müəyyən bir taktika kimi ortaya çıxmayıb, sadəcə müxalifət bu yola getməyə məhkum olub», çərşənbə axşamı Trend News-a ACP-nin İdarə Heyətinin üzvü, partiya liderinin müşaviri Zəminə Dünyamalıyeva deyib.

Müxalif Azərbaycan Xalq Cəbhəsi Partiyası (AXCP) Ali Məclisinin keçmiş sədri Qulamhüseyn Əlibəyli yeni partiya yaratmaq niyyətindədir.
«Mənim partiya yaradacağım istisna olunmur. Əgər bu baş versə, yaradacağım partiyanın dəst-xətti parlament tipli olacaq», çərşənbə axşamı Trend News-a Əlibəyli bildirib.
Əlibəyli xatırladıb ki, artıq o, qarşıdan gələn prezident seçkilərində iştirak barədə qərar verib və müvafiq sənədləri Mərkəzi Seçki Komissiyasına təqdim edib. «Seçki prosesi zamanı mənim partiya yaratmaqla bağlı planlarım dəqiqləşəcək.

2008 – ci il prezident seçkiləri ilə əlaqədar Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahının üzvləri beynəlxalq təşkilatlarla görüşlərinin davam etdirir. Bu gün ATƏT–in Bakı ofisində AVCİYA Seçki Qərargahının rəhbəri Məhərrəm Zülfüqarlı təşkilatın məsul işçiləri Juliane Markard–Narten və Məryəm Hacı–İsmayılova ilə görüşüb.

Məlum olduğu kimi Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahı ilə ABŞ Respublikaçılar İnstitutu (IRI) Bakı ofisi arasında bu ilin fevralında seçki müşahidəçiləri üçün treninqlərin keçirilməsi və seçki maarifçiliyi sahəsində əməkdaşlıq barədə razılıq əldə olunmuşdur. Bu əməkdaşlığa əsasən IRI ekspertləri AVCİYA Seçki Qərargahının 15 nəfərdən ibarət trenerlər qrupuna keçən həftə 4 günlük seminarlar keçmişlər.

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahının üzvləri 2008–ci il prezident seçkiləri ilə əlaqədar beynəlxalq təşkilatlarla görüşlərinin davam etdirir. Bu gün AVCİYA Seçki Qərargahının rəhbəri Məhərrəm Zülfüqarlı İFES-in Bakı ofisində ölkə üzrə direktoru Dən Blessinqton və layihə koordinatoru Şəhla Mahmudova ilə görüşüb.