Azərbaycanda prezident seçkilərini izləmiş ATƏT Müşahidə Missiyasının rəhbəri, səfir Boris Frles bu gün prezidentliyə keçmiş namizədlər – Qüdrət Həsənquliyev, Fazil Qəzənfəroğlu və İqbal Ağazadə ilə ayrı-ayrılıqda görüş keçirib. Q. Həsənquliyevin APA-ya verdiyi məlumata görə, görüşdə prezident seçkilərinin nəticələri, səsvermə, səslərin sayılması prosesi və digər məsələlər müzakirə mövzusu olub. ATƏT təmsilçisi seçkidə iştirak edən müxalifət partiyalarının seçkilərdən sonrakı fəaliyyəti ilə maraqlanıb: “Səfirdən nəyə əsasən seçkidə iştirak edən partiyaları deyil, Müsavatı əsas müxalifət partiyası hesab etməsinin səbəbini soruşdum. Bundan başqa, Əli Kərimlinin partiyasının ikinci şəxsinin seçkilərə qatıldığını bildirdim və soruşdum ki, nəyə görə əsas müxalifət partiyalarının seçkidə iştirak etmədiyini deyirlər. Mənim bu iradlarımın heç birinə ciddi arqumentlə cavab verə bilmədilər”. Q. Həsənquliyev növbəti mərhələdə Seçki Məcəlləsinin dəyişdirilməsinə çalışacaqlarını qeyd edib.

Ümid Partiyasının sədri İqbal Ağazadə APA-ya bildirib ki, görüşdə seçkilərin nəticələri, ATƏT-in seçkilərdən əvvəlki hesabatı ətrafında müzakirə aparılıb. B. Frles Ümid Partiyasının gələcək fəaliyyəti və seçkilərdə hansı formada iştirakı ilə maraqlanıb. Seçkilərlə bağlı cəmiyyətin ayrı-ayrı tərəflərin rəyləri ətrafında fikir mübadiləsi aparılıb və sonda İ. Ağazadə ATƏT-in rəyi ilə bağlı öz fikrini bildirib: “Hesab edirəm ki, ATƏT-in rəyi obyektivdir. ATƏT-in də, AŞ PA-nın da, Avropa Birliyinin də rəyləri ümumilikdə Azərbaycan seçicisinin reallığını əks etdirir”.

Böyük Quruluş Partiyasının (BQP) sədri Fazil Qəzənfəroğlu da APA-ya bildirib ki, ATƏT Müşahidə Missiyasının rəhbəri ilə görüşdə qurumun prezident seçkiləri ilə bağlı ilkin rəyi ətrafında müzakirə aparılıb: “Ümumi qəbul olunmuş qaydalar, seçkidə baş verən müəyyən problemlər, gələcəkdə atılan addımlarla bağlı müzakirə aparıldı”. /APA/