Azərbaycanda keçiriləcək prezident seçkisini müşahidə edəcək Avropa Şurası Parlament Assambleyası, ATƏT və Avropa Parlamentinin müşahidə missiyası bu gün müxalifətçi namizədlərlə görüşüb.

«Görüşdə müşahidə missiyası rəhbərləri seçki platforması barədə geniş məlumatlar alıblar», - çərşənbə axşamı Trend News-a Azərbaycanın müxalifyönlü Böyük Quruluş Partiyasının (BQP) başqanı, prezidentliyə namizəd Fazil Qəzənfəroğlu bildirib.

«Mən hakim partiyanın namizədi, indiki dövlət rəhbəri İlham Əliyevin namizədlər arasında alternativinin olmadığı haqda ATƏT-in bir müddət əvvəl açıqlanan hesabatındakı rəyə etirazımı bildirdim. AŞ PA missiyasının rəhbərinə mənim və İlham Əliyevin platformasını ingilis dilinə çevirib müqayisə etməyi təklif etdim», - Qəzənfəroğlu deyib.

Namizədliyi özü tərəfindən irəli sürülmüş Qulamhüseyn Əlibəyli isə Trend News-a deyib ki, beynəlxəlq mühaşidəçilərlə görüşdə bəzi müxalifət partiyalarının boykot qərarı müzakirə edilib.

«Mənim rəyim ondan ibarət olub ki, bəzi müxalifət partiyalarının seçkini boykot etməsi onların hüququdur. Lakin onlara etiraz etdiyim üçün seçkilərdə iştirak edirəm», - Əlibəyli deyib.

Görüşdə iştirak edən müxalifətçi prezidentliyə namizəd Bütöv Azərbaycan Xalq Cəbhəsi Partiyasının (BAXCP) prezidentliyə namizədi Qüdrət Həsənquliyevin səlahiyyətli nümayəndəsi Elçin Mirzəbəyli isə Trend News-a deyib ki, beynəlxalq müşahidəçilər əsasən Həsənquliyevin hakimiyyətə gəldikdən sonra aparacağı islahatlarla maraqlanıblar.

Beynəlxalq müşahidəçilər həmçinin müxalif Müasir Müsavat Partiyasının prezidentliyə namizədi Hafiz Hacıyev və Ümid Partiyasının prezidentliyə namizədi İqbal Ağazadə ilə də görüşüblər.

Prezidentliyə namizəd, müxalif Müasir Müsavat partiyasının sədri Hafiz Hacıyev Avropa Şurası Parlament Assambleyasının (AŞ PA) müşahidə missiyasının rəhbəri Andres Herkellə görüşdə bir sıra narazılıqlarını bildirib.

«Görüşdə AŞ PA nümayəndələrinin prezident seçkisində müxalifətin iştirak etməməsi fikrinə etirazımı bildirdim. Onların nəzərinə çatdırdım ki, namizədlər arasında ən radikal müxalifəti təmsil edirəm. Seçkiyə qatılmayan müxalifət Qərbin müxalifətidir. Mənim təmsil etdiyim müxalifət sizə xidmət etməyəcək», - çərşənbə axşamı Herkelle görüşdən sonra Hacıyev Trend News-a bildirib.

Prezidentliyə namizəd bildirib ki, ATƏT-in seçki ilə bağlı ədalətli qərar çıxaracağına da inanmır. /Trend/