Mərkəzi Seçki Komissiyasının (MSK) sədri Məzahir Pənahov bütün seçiciləri sabah keçiriləcək prezident seçkilərində səs verməyə çağırıb.
APA-nın məlumatına görə, bu barədə MSK sədri dünən keçirdiyi mətbuat konfransında bildirib: “Seçki hüququ olan bütün vətəndaşları seçki məntəqələrinə gələrək, ölkənin gələcəyi üçün xüsusi əhəmiyyət kəsb edən prezident seçkilərində iştiraka və ən layiqli namizəd səs verməyə çağırıram”.

O, seçki komissiyalarının seçkilərə tam hazır olduğunu vurğulayıb: “Seçki günü bütün seçki komissiyaları gərgin və operativ rejimdə işləyəcək, qəbul olunan bütün məlumatlar ictimaiyyətə çatdırılacaq, problemlər dərhal aradan qaldırılacaq”. MSK sədri səslərin sayılması prosesinin məntəqələrdə ən uzağı 2 saat çəkəcəyini və 3 saat ərzində isə məlumatların DSK-lara ötürüləcəyini qeyd edib: “Bu baxımdan saat 22.00 radələrində ilkin nəticələrin açıqlanmasına başlanılacaq”.

Məzahir Pənahov həmçinin seçkilərə hazırlıqla bağlı həyata keçirilmiş tədbirlər haqqında məlumat verib. M. Pənahov 21 nəfərin prezidentliyə namizədliyinin irəli sürüldüyünü, onlardan 11-nin MSK-ya imza vərəqələrini təqdim etdiyini, 1 nəfər imza vərəqələrini boş, 1 nəfər isə gec təhvil verdiyindən bu imza vərəqələrinin qəbul olunmadığını xatırladıb: “Daha iki nəfərin topladığı imzaların bir hissəsi etibarsız hesab edildiyindən prezidentliyə yeddi nəfərin namizədliyi qeydə alınıb və hazırda seçki bülletenlərində yeddi namizədin adı var”. M. Pənahov təbliğat-təşviqat mərhələsində bütün namizədlərə bərabər şərait yaradıldığını, kampaniyanın gedişində hər hansı ciddi problemin ortaya çıxmadığını bildirib. O, 5 min 359 seçki məntəqəsində səsvermə keçiriləcəyini, bunların 33-nün xarici ölkələrdə, 24-nün təcridxanalarda olduğunu qeyd edib. MSK sədrinin sözlərinə görə, seçki günü adı seçici siyahılarında olmayan seçicilər şəxsiyyət vəsiqələrini yaşadıqları əraziyə səlahiyyətli olan məntəqə seçki komissiyasına təqdim etməklə əlavə seçici siyahısına düşə bilərlər.

MSK sədri seçki məntəqələrinin səhər saat 07.30-da açılacağını, ilk olaraq bülletenlərin sayılacağını və aktlaşdırılacağını, saat 08.00-da isə səsvermə prosesinin başlayacağını vurğulayıb. Səsvermə axşam saat 19.00-da başa çatacaq. M. Pənahov səslərin sayılması prosesinin də müşahidəçilərin iştirakı ilə keçiriləcəyini söyləyib.

Mətbuat konfransından sonra veb-kameralar quraşdırılmış seçki məntəqələri jurnalistlərə nümayiş etdirilib. Səsvermə günü istənilən maraqlı şəxs MSK-nın rəsmi saytı vasitəsilə 500 məntəqədə səsvermənin gedişini izləyə biləcək. /APA/