“Azərbaycanda keçirilən prezident seçkilərinin sönük keçirilməsi haqqında danışmaq ədalətsizlikdir və reallığı təhrif etməkdən başqa bir şey deyil”. APA-nın məlumatına görə, bu sözləri Yeni Azərbaycan Partiyasının (YAP) sədr müavini, prezidentliyə namizəd İlham Əliyevin vəkili Əli Əhmədov partiyanın rəsmi saytına verdiyi müsahibədə deyib. Ə. Əhmədovun sözlərinə görə, 2008-ci ilin prezident seçkiləri kampaniyası fərqli şəraitdə və formada keçir. Bütövlükdə isə Azərbaycanda seçki kampaniyasının fəlsəfəsində ciddi dəyişikliklər baş verib: “Biz onun əleyhinəyik ki, ölkədə keçirilən hər bir seçki kampaniyası bu prosesə qoşulan tərəflərin və siyasi qüvvələrin bir-birini təhqir etməsi, hücumlar etməsi, bir-birinin ləyaqətinin alçaldılması şəklində cərəyan etməlidir. Seçki kampaniyası elə bir formada siyasi əxlaq, mədəniyyət, etika çərçivəsini pozmadan keçirilməlidir ki, kampaniya başa çatdıqdan sonra ölkənin vətəndaşı olan və siyasi kampaniyaya qoşulan insanlar vətəndaş həmrəyliyi ideyası ətrafında birləşə bilsinlər. Ona görə də bu seçkilərin daha yüksək professionallıq şəraitində, amma açıq-aşkar bir-birlərini təhqir etmədən keçirilməsini müsbət hadisə hesab edirəm”.

Ə. Əhmədov deyib ki, hələ də ölkə daxilində maraqlarına xidmət edənlər mövcuddur: “Azərbaycan dünyanın bir sıra dövlətlərin maraqlarının və niyyətlərinin çarpazlaşdığı bölgədə yerləşir. Buna görə də respublikamıza kənardan təzyiq göstərmək istəyən və bu niyyətlərlə yaşayan qüvvələr mövcuddur. Daha çox təəssüf hissi yaradan odur ki, Azərbaycanda yaşayan bəzi şəxslər hələ ölkəmizə kənardan təzyiq göstərmək istəyən qüvvələrlə işbirliyində olmaq niyyətindədir. Beləliklə, həm xaricdə, həm də daxildə olan belə qüvvələrin ölkəmizdə keçirilən prezident seçkilərinin ümumi abı-havasına kölgə salmaq, onun mahiyyətini təhrif etmək cəhdləri başa düşüləndir. Bildirmək istəyirəm ki, indiyə qədər keçirdiyimiz bütün görüşlərdə, ictimaiyyətlə apardığımız görüşlərdə gəldiyimiz qənaət bundan ibarətdir ki, Azərbaycan vətəndaşları bu cür cəhdlərə və həmin cəhdlərdə bulunan insanlara biganədirlər”. /APA/