Saat 14:00-a qədər seçkini işıqlandıran jurnalistlər tərəfindən Azərbaycan Mətbuat Şurasının "qaynar xətt"inə hər hansı məlumat daxil olmayıb.
Mətbuat Şurası bu barədə yaydığı məlumatda bildirir ki, Şuranın monitorinq qrupunun paytaxt və bölgələrdəki seçki məntəqələrində olan üzvləri də jurnalistlərə qarşı maneə faktı qeydə almayıblar.
Şuranın (012) 441 35 30; (012) 441 35 92; (012) 441 35 94 nömrələri bu gün saat 08.00-dan "qaynar xətt" rejimində işləyir.
Jurnalistlərin seçki günü peşə fəaliyyətlərini yerinə yetirmələrində yarana biləcək mümkün problemlərin operativ həllini təmin etmək məqsədi ilə yaradılan "qaynar xətt"in növbəti məlumatı saat 17.00-da yayımlanacaq.
Azərbaycan Mətbuat Şurasının İdarə Heyətinin üzvləri də seçkinin gedişini izləyirlər. Onlar yerlərdə KİV təmsilçilərinə yaradılan şəraitlə yaxından tanış olurlar.
Mərkəzi Seçki Komissiyasının rəsmi məlumatına görə, parlamentə seçkilər uğrunda 690 namizəd mübarizəyə qatılıb.

Azərbaycanda parlament seçkiləri majoritar sistem üzrə 125 seçki dairəsində aparılır. Bundan əvvəlki seçkilər 2005-ci ilin noyabr ayında keçirilib

TREND