Azərbaycan prezidentliyinə keçmiş namizəd, müxalif Müasir Müsavat Partiyasının sədri Hafiz Hacıyev hesab edir ki, yaradılması nəzərdə tutulan prezidentliyə namizədlərin bloku yeni müxalifəti təmsil edəcək.

«Azərbaycanda prezident seçkisindən sonra yeni müxalifət formalaşır və bu müxalifət sivil və normal mübarizə aparmaq əzmindədir», - deyə Hacıyev bazar ertəsi Trend News-a bildirib.

Hacıyevin sözlərinə görə, prezidentliyə namizədlərin yeni blokunun yaradılması məsələsinin ilkin müzakirələri aparılıb. «Bəzi namizədlərlə aparılmış söhbətlərdə qərara alınıb ki, blokun yaradılması məsələsi gündəmdə saxlanılsın və müzakirələr davam etdirilsin», - deyə Hacıyev bildirib.

Onun bildirdiyinə görə, yeni yaradılacaq blok tarixin arxivinə göndərilmiş müxalifət partiyalarının yenidən baş qaldırmasına imkan verməyəcək. «Müxalifət bir qrup şəxs tərəfindən inhisara alınmışdı. Apardığımız mübarizə və ideyalarımız sayəsində seçkidən sonra onları kənarda qoyduq», - deyə o əlavə edib.

Hacıyev prezidentliyə keçmiş namizəd, Liberal-Demokrat Partiyasının sədri Fuad Əliyevin yaradılması nəzərdə tutulan blokla bağlı müzakirələrdə hələlik iştirak etmədiyini bildirib. «İstəyirik ki, arxasında güc olan qüvvələrlə bloku yaradıb əməkdaşlıq quraq. Fuad Əliyev seçkidə iştirak etsə də, onun arxasında formalaşmış strukturları yoxdur. Fuad Əliyevlə bu barədə söhbət aparılıb və o, bunu normal qarşılayb. O sevinməlidir ki, bizim kimi partiyalarla bir yerdə seçkiyə qatılıb», - deyə Hacıyev əlavə edib.

Prezidentliyə keçmiş namizəd Qulamhüseyn Əlibəyliyə gəlincə, Hacıyev bildirib ki, hazırda o, partiya quruculuğu ilə məşğuldur. «Partiyanın təsis olunmasından sonra onunla əməkdaşlıq etməyə hazırıq», - deyə Hacıyev qeyd edib.

Bu həftə ərzində prezidetliyə namizədlər arasında növbəti müzakirələrin aparılacağını bildirən keçmiş namizəd blokun yaradılmasında tələskənliyə yol verilməyəcyini bildirib. /Trend/