“Demokratiya və iqtisadi inkişaf uğrunda təşkilat - GUAM” Azərbaycanda qarşıdakı prezident seçkisində müşahidəçilərin monitorinq missiyasını yaradır.

Azərbaycan XİN oktyabrın 15 -nə təyin edilən prezident seçkisinə müşahidəçilər missiyası göndərmək üçün GUAM-a dəvət göndərib.

“Biz təşkilata üzv bütün ölkələrə dəvət göndərmişik və hazırda namizədlərin təqdim edilməsini gözləyirik. Müşahidəçilər Gürcüstan, Ukrayna və Moldova parlamentarilərindən olacaqlar”, - GUAM-ın Baş katibi Valeri Çeçelaşvili bildirib. Müşahidəçilər missiyasına GUAM-ın Baş katibi başçılıq edəcək.. /Trend/

Azərbaycanın Mərkəzi Seçki Komissiyasının (MSK) çərşənbə axşamı keçirilən iclasında Böyük Quruluş Partiyasının sədri Fazil Qəzənfəroğlu və Müasir Müsavat Partiyasının sədri Hafiz Hacıyevin prezidentliyə namizədliyi qeydə alınıb.
21 nəfər prezidentliyə namizədliyini irəli sürüb və MSK- dan imza vərəqələri götürüb.

Yeni Azərbaycan Partiyasının namizədi İlham Əliyev, Ümid Partiyasının sədri İqbal Ağazadə, Müasir Müsavat Partiyasının sədri Hafiz Hacıyev, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Böyük Quruluş Partiyasının sədri Fazil Qəzənfəroğlu, “Yaşıl Siyasət” Təşəbbüs Qrupunun sədri Mais Güləliyev, şair Ağaevli Əli İsa, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli lazım olan 40 min imzanı toplayaraq, MSK-ya təqdim ediblər.

YAP-ın namizədi İlham Əliyev və Ümid Partiyasının sədri İqbal Ağazadənin namizədliyi MSK-nın ötən iclaslarında qeydə alınıb.

Yeddi nəfər imza vərəqələrini qaytarmayıb, dörd nəfər namizədliyini geri götürüb.

Onlardan iki nəfərin namizədliyinə xitam verilib.

İclasda namizədliyini geri götürmüş işsiz Əlimuxtar Əkbərov və Süleyman Quliyevin namizədliyinə xitam verilməsi barədə də qərar çıxarılıb. MSK müəyyən edib ki, Quliyev Rusiya vətəndaşıdır. Azərbaycan Konstitusiyasına görə, xarici ölkə vətəndaşı prezidentliyə iddialı ola bilməz.

Komissiya üzvləri YAP-ın namizədi İlham Əliyevin 50 nəfər vəkilini də qeydə alıblar. /Trend/

Azərbaycanın Mərkəzi Seçki Komissiyasında ölkədə prezident seçkilərinin gedişini izləyəcək ATƏT-in müşahidəçi missiyasının 41 nümayəndəsi qeydiyyatdan keçib. Bu barədə Trend News-a çərşənbə axşamı MSK-nın Beynəlxalq əlaqələr şöbəsinin müdiri Rövzət Qasımov deyib.

Azərbaycanda prezident seçkiləri oktyabrın 15-də keçiriləcək. Seçki prosesini ATƏT-in 40 uzunmüddətli və 450 qısamüddətli nümayəndəsi izləyəcək.

Qasımov bildirib ki, qeydiyyatdan keçmiş 28 müşahidəçi uzunmüddətli, 13 müşahidəçi isə nümayəndə heyətinin əsas tərkibinin üzvləridir.

Onun sözlərinə görə, MSK-da qeydiyyatdan keçmiş müşahidəçilər 24 ölkənin nümayəndəsidir.

Qasımov onu da bildirib ki, MDB-nin missiyası Azərbaycana sentyabrın ortalarında gələcək./Trend/

Oktyabrın 15-də Azərbaycanda keçiriləcək prezident seçkilərində istifadə olunacaq gözlə görünməyən mürəkkəb və detektorlar Danimarkadan alınacaq. Bu barədə APA-ya Mərkəzi Seçki Komissiyasının (MSK) beynəlxalq əlaqələr şöbəsinin müdiri Rövzət Qasımov məlumat verib. Onun sözlərinə görə, mürəkkəb və detektorlarla bağlı artıq Danimarkanın müvafiq firmasına sifariş verilib. O, avadanlıqların sentyabrın sonunda Azərbaycana gətiriləcəyini deyib. R. Qasımov onu da bildirib ki, 2005-ci il parlament seçkilərində alınmış mürəkkəb və detektorların istifadə müddəti başa çatdığı üçün onlardan istifadə olunmayacaq. /APA/

“Ayaz Mütəllibov mənimlə söhbətində deyib ki, Araz Əlizadə sındırılıb. Onun hansı dairələr tərəfindən sındırılmasını və kimlərin dəyirmanına su tökməsini isə Araz Əlizadə özü daha yaxşı bilir. ASDP-nin dağıdılması ilə müşayiət olunan proses buna misaldır”. Bu sözləri APA-ya ASDP Mərkəzi Komitəsinin sabiq Büro üzvü Elşən Manafov deyib. Onun sözlərinə görə, ASDP sabun köpüyü kimidir və nə qədər ki, A. Əlizadə kimiləri bu quruma rəhbərlik edəcək, təşkilat öz fəaliyyətini bərpa edə bilməyəcək: “Mən partiyada Araz Əlizadənin rəhbərlik etdiyi mühafizəkar qanad tərəfindən qurumdan uzaqlaşdırılmışam. Əgər qərəzli və təhqiredici fikirlər söyləmişəmsə, məhkəməyə müraciət edə bilərlər. Təəssüf ki, Araz Əlizadə Nizamnamədən öz istədiyi kimi istifadə edir və təkbaşına qərarlar verir”.
E. Manafovun sözlərinə görə, ASDP parçalanıb, partiya daxilində ciddi fikir ayrılığı hökm sürür: “Nizamnaməyə görə, qərarla bağlı Mərkəzi Nəzarət Təftiş Komissiyasına müraciət etməliyəm. Amma həmin qurumun rəhbəri də Araz Əlizadənin adamıdır. Partiya real olaraq, Ayaz Mütəllibov və Araz Əlizadə tərəfdarları arasında parçalanıb. Yaxın zamanlarda bu parçalanma tam çılpaqlığı ilə ortaya çıxacaq”.
E. Manafov yeni sol təmayüllü partiyanın yaradılması istiqamətində işlərə başlayacağını da qeyd edib: “Bunda Azərbaycan hakimiyyəti, müxalifətin islahatçı dairələri də maraqlı olmalıdırlar. Hər bir halda prezident seçkilərindən sonra, gələn ilin birinci yarısında partiyanın yaradılması ilə bağlı ilkin mərhələni keçə biləcəyik”.
Araz Əlizadə isə APA-ya E. Manafovun plenumun üzvlərinin yekdil qərarı əsasında partiyadan xaric edildiyini bildirib: “Mənim barəmdə dedikləri həqiqətə uyğun deyil. Ayaz Mütəllibov da Elşənin onun adından dediklərini təkzib elədi. Plenuma telefon vasitəsilə qoşulan Ayaz Mütəllibov Elşən Manafovu hətta yalançılıqda qınadı”./APA/

Azərbaycanın hakim Yeni Azərbaycan Partiyasının (YAP) prezident seçkisinə hazırlıqla əlaqədar, bazar ertəsi ümumrespublika müşavirəsi keçirilib. Müşavirədə YAP sədrinin müavini, icra katibi Əli Əhmədov çıxış edərək prezident seçkilərinə hazırlıqla bağlı görülmüş işlər və seçki kampaniyasının təşviqat mərhələsində, müəyyən edilmiş proqrama uyğun olaraq, partiyanın rayon təşkilatlarının qarşısında duran vəzifələrdən danışıb. Bu barədə Trend News-a partiyanın mətbuat xidmətindən məlumat verilib.

Müşavirədə YAP-ın potensialının seçki kampaniyasının təşviqat mərhələsinin də yüksək səviyyədə həyata keçiriləcəyinə zəmanət verdiyi bildirilib. Təşviqat kampaniyasına hazırlıq, qarşıda duran vəzifələr, təşviqatın yeni metodları barədə geniş fikir mübadiləsi aparılıb.

Ümumrespublika müşavirəsində təşviqat kampaniyası ilə bağlı rayon (şəhər) təşkilat sədrlərinə lazımi tövsiyə və tapşırıqlar verilib. /Trend/

Müxalifətyönlü Azərbaycan Demokratik Partiyası (ADP) hesab edir ki, bəzi müxalifət partiyalarının prezident seçkisinin nəticəsini əvvəlcədən tanımamaq barədə bəyanatını səhv siyasi addımdır.
“Bir neçə müxalifət partiyasının bəyanatı regionda ölkənin dövlət müstəqilliyinə təhlükənin artdığı vaxtda Azərbaycanda demokratik vəziyyətin pisləşməsinə gətirəcək”, - ADP hesab edir.
ADP hesab edir ki, qəbul edilən bəyanat müxalifətin gələcək strateji və əməkdaşlıq imkanlarına ciddi zərbə vurub. /Trend/

Azərbaycan hakimiyyəti bəzi müxalifət partiyalarının prezident seçkisini qanunsuz adlandırması və seçkidən sonra formalaşdırılacaq hakimiyyəti qeyri-legitim hesab etməsi barədə bəyanatını fəaliyyət imitasiyası hesab edir.
«Seçkidə iştirak etməyən partiya hər hansı bir fəaliyyətlə məşğul olmalıdır. Bunun üçün də cəmiyyətdə müəyyən nüfuza və sosial dayağa malik olmaq lazımdır. Amma müxalifətdə bu yoxdur. Olub-qalan imiclərini də seçkiyə qatılmamaqla itirdilər və indi də fəaliyyət imitasiyası ilə məşğuldular», bazar ertəsi Prezidentin İcra Aparatının İctimai-siyasi şöbəsinin müdiri Əli Həsənov Trend News-a bildirib.

Azərbaycanda prezident seçkiləri oktyabrın 15-də keçiriləcək. «Azadlıq» blokuna daxil olan partiyalar – Xalq Cəbhəsi, Liberal Partiya, Vətəndaş və İnkişaf Partiyası, Müsavat və «Azərbaycan Naminə» İctimai Forum ötən həftə seçkini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.

Həsənovun sözlərinə görə, prezident seçkisində namizəd problemi yoxdur. «Əksər siyasi palitra bu seçkidə təmsil olunub. Seçki kifayət qədər şəffaf və mübarizə şəraitində keçiriləcək. Ona görə də müxalifətin fəaliyyətinin cəmiyyət üçün nə mənfi, nə müsbət çaları olmayacaq və bu fəaliyyət heç bir əhəmiyyət kəsb etmir», - deyə o bildirib. /Trend/

Prezidentliyə namizədlərin Mərkəzi Seçki Komissiyasına (MSK) təqdim etdikləri imzaların yoxlanması prosesi sentyabrın 15-nə kimi yekunlaşacaq. Bu barədə APA-ya seçki sənədlərinin yoxlanılması üçün MSK-da yaradılmış işçi qrupun üzvü İlham Məmmədov məlumat verib. İ. Məmmədov bu vaxta qədər iki namizədin imzalarının yoxlanıldığını və onların namizədliklərinin təsdiqləndiyini xatırladıb. Dörd namizədin imzalarının və digər seçki sənədlərinin yoxlanılması başa çatmaq üzrədir, digər 4 namizədlə bağlı iş isə yeni başlayıb. Seçici imzalarının yoxlanılmasında Ədliyyə Nazirliyinin Məhkəmə Ekspertizası Mərkəzinin əməkdaşları və Daxili İşlər Nazirliyinin Pasport Masa Qeydiyyatı İdarəsinin mütəxəssisləri də iştirak edirlər. Namizədin əmlakı, dövlətə borcları ilə bağlı Maliyyə və Vergilər nazirliklərinə, Daşınmaz Əmlakın Dövlət Reyestri Xidmətinə, Dövlət Əmlakının İdarə Edilməsi üzrə Dövlət Komitəsinə, Daxili İşlər Nazirliyinin Yol Polisi Xidmətinə sorğular göndərilir, namizəd tərəfindən təqdim edilən məlumatların düzgünlüyü yoxlanılır. İ. Məmmədov MSK-ya təqdim olunan imzalar içərisində saxtalaşdırma hallarının olduğunu da bildirib: “Toplanan imzaların ideallığından danışmaq olmaz. Əsas çatışmazlıqlar bir nəfərin bir neçə seçicinin yerinə imza atması, 18 yaşına çatmayanların imzaları, şəxsiyyət vəsiqələrində göstərilən nömrələrin düzgün qeyd olunmamasıdır”. /APA/

Azərbaycan Sosial Demokrat Partiyasının (ASDP) Mərkəzi Komitəsinin Büro üzvü Elşən Manafov partiya sıralarından azad edilib. Partiyanın mətbuat xidmətindən APA-ya daxil olan məlumata görə, MK-nın ötən gün keçirilən iclasında E. Manafovun son vaxtlar mətbuatda partiya rəhbərliyinə qarşı çıxışları müzakirə edilib. İclasda E. Manafovun qərəzli şəkildə mətbuat səhifələrinə müxtəlif məsələlər çıxardığı, partiya rəhbərliyinin ictimai nüfuzuna xələl gətirməyə cəhd etdiyi, onun bu hərəkətinin etik davranış normalarına uyğun gəlmədiyi bildirilib. Mərkəzi Komitə onun partiyadan çıxarılması barədə qərar qəbul edib. İclasda həmçinin, partiyanın növbəti qurultayının sentyabrın 27-də keçirilməsi qərara alınıb. /APA/

Oktyabrın 15-də keçiriləcək prezident seçkiləri ilə bağlı Mərkəzi Seçki Komissiyasının (MSK) nəzdində yaradılmış mətbuat qrupunun ilk iclası keçirilib. APA-nın məlumatına görə, MSK üzvü Azər Tağıyev qrupun sədri seçilib. İclasda seçkilərin təbliğat-təşviqat mərhələsində atılacaq addımlarla bağlı məlumat verilib. A. Tağıyev bildirib ki, qrupun əsas məqsədi təbliğat-təşviqat kampaniyasının gedişində Seçki Məcəlləsinin tələblərinə necə əməl olunmasının, mətbuatda gedən reklamların və təbliğat materiallarının izlənməsidir. A. Tağıyev onu da qeyd edib ki, təbliğat-təşviqat kampaniyasında iştirak etmək üçün MSK-ya müraciət etməyən KİV-lər belə bir kampaniya apararlarsa, qanunda nəzərdə tutulan addımlar atılacaq. O, xarici KİV-lərin təbliğat kampaniyasında iştirak etmək hüququnun olmadığını qeyd edib. /APA/

Azərbaycanda Vətəndaş Cəmiyyətinin İnkişafına Yardım Assosiasiyası “AVCİYA-nın Prezident seçkiləri ilə bağlı fəaliyyəti: görülmüş işlər və qarşıda duran vəzifələr” mövzusunda mətbuat konfransı keçirməyi qərara alıb.
“Trend” İnformasiya Agentliyinin konfrans zalında keçirilməsi planlaşdırılan tədbirə KİV təmsilçiləri dəvətlidirlər.

Tədbir 10 sentyabr saat 11:00-dan 12:00-dək davam edəcək.

Ünvan: Firudin Agayev küçəsi 14 (AMEA-nın yanı)

Əlavə məlumat üçün aşağıdakı telefonlara müraciət edə bilərsiniz:

596-69-21

408-27-93