Böyük Quruluş Partiyasının (BQP) başqanı, prezidentliyə namizəd Fazil Qəzənfəroğlu ATƏT-in Seçkiləri Müşahidə Missiyasının rəhbəri, səfir Boris Frles və qurumun siyasət üzrə təhlilçisi Rafael Metyunu qəbul edib.
BQP mətbuat xidmətindən APA-ya verilən məlumata görə, görüşdə seçkiqabağı dövrdə ölkədəki ictimai-siyasi vəziyyət müzakirə edilib, F. Qəzənfəroğlu partiyanın seçkilərə hazırlığı barədə məlumat verib. /APA/

“Məhbusların prezident seçkisində iştirakında heç bir problem olmayacaq. Bu proses qanunvericiliyə uyğun şəkildə həyata keçiriləcək”. APA-nın məlumatına görə, bunu jurnalistlərə açıqlamasında ədliyyə naziri Fikrət Məmmədov deyib.

Onun sözlərinə görə, hər bir məhbus səsvermə hüququna malikdir və bu hüququndan da istifadə edəcək. Cəzaçəkmə müəssisələrində seçki məntəqələrinin yaradılacağını söyləyən nazir prezidentliyə namizədlərin cəzaçəkmə müəssisələrində təbliğat aparmasına da hər cür şəraitin yaradılacağını bildirib. /APA/

Sentyabrın 16-17-də Avropa Şurası Parlament Assambleyasının (AŞ PA) seçkiqabağı missiyası Bakıda səfərdə olacaq.
Missiyanın rəhbəri, AŞ PA Monitorinq Komitəsinin Azərbaycan üzrə həmməruzəçisi Andres Herkel APA-ya bildirib ki, missiya AŞ PA-nın bütün siyasi qruplarını təmsil edən 6 nəfərdən ibarət olacaq. Azərbaycanda seçkiqabağı mühiti öyrənmək məqsədilə avropalı deputatlar prezidentliyə namizədlər, Mərkəzi Seçki Komissiyası rəhbərliyi, qeyri-hökumət təşkilatlarının nümayəndələri ilə görüşlər keçirəcəklər.

Proqrama əsasən, seçkilərdə iştirak edəcək partiyaların təmsilçiləri ilə görüşəcəklərini deyən A. Herkel boykot qərarı verənlərlə da bir araya gəlmək istədiyini qeyd edib: “Onların mövqeyi məni çox maraqlandırır, imkan olsa, onlarla da görüşmək istəyirəm”.

A. Herkelin sözlərinə görə, missiyanın regionlara səfəri nəzərdə tutulmasa da, seçkilər günü AŞ PA təmsilçiləri Azərbaycanın müxtəlif ərazisində müşahidə aparacaqlar.

Qeyd edək ki, 15 oktyabr prezident seçkilərini AŞ PA-nın 30 nəfərdən ibarət müşahidə missiyası izləyəcək. /APA/

Azərbaycanın hakim Yeni Azərbaycan Partiyası (YAP) prezidentliyə namizədi, hazırkı dövlət başçısı İlham Əliyevin seçki fondunu yaradıb. «Hazırda seçki fonduna könüllü vəsaitin daxil olması prosesi gedir», - bu barədə cümə günü jurnalistlərə YAP icra katibinin müavini, deputat Mübariz Qurbanlı bildirib.
Qurbanlı fonda toplanan vəsaitin miqdarı barədə məlumat verməyib.

Hakim partiyanın seçki təbliğatına nə qədər pul xərclənəcəyinə gəldikdə, Qurbanlı qeyd edib ki, aparacaqları təbliğatın kökündə maddi vəsait dayanmır: «YAP-ın 450 min üzvü var və biz çox vəsait xərcləmədən kampaniyanı qura biləcəyik. Bizim hər bir üzvümüzün təbliğatçı rolunda çıxış etməsi kifayət qədər işdir. Hər bir partiya üzvünü və onun ailə üzvlərini hərəkətə gətirsək, bu, milyon yarım Azərbaycan vətəndaşı deməkdir». /Trend/

Azərbaycanın hakim Yeni Azərbaycan Partiyası (YAP) Bakı Şəhər İcra Hakimiyyətinin prezident seçkisi ərəfəsində kütləvi aksiyaların keçirilməsi üçün ayırdığı yerləri məqbul hesab edir.

«YAP hesab edir ki, əsas məsələ prezidentliyə namizədlərin aksiyaları harada deyil, kimlərlə keçirməsidir. Namizədi dəstəkləyən insanlar varsa, aksiyaların harada keçirilməsindən asılı olmayaraq, orada iştirak edəcəklər», - Trend News-un məlumatına görə, cümə günü YAP icra katibinin müavini, deputat Mübariz Qurbanlı bildirib.

Bakı Şəhər İcra Hakimiyyəti «Sərbəst toplaşmaq azadlığı haqqında» Qanuna müvafiq olaraq, paytaxtın rayonlarında toplantıların keçirilməsi üçün ayrılmış açıq yerlərin ünvanlarını müəyyənləşdirib.

«Azadlıq» blokunun həmsədri, Vətəndaş və İnkişaf Partiyasının (VİP) sədri Əli Əliyev hesab edir ki, Bakı Şəhər İcra Hakimiyyəti tərəfindən ayrılmış yeni yerlər əslində əvvəlki yerlərdən heç nə ilə fərqlənmir.

«Kütləvi tədbirlərin keçirilməsində məqsəd mövcud problemləri ictimaiyyətin diqqətinə çatdırmaqdır. Onların keçirilməsi üçün şəhərdən kənar yerlərin ayrılmasında məqsəd kütləvi tədbirin mahiyyətini heçə endirmək və tədbir keçirən tərəfin mövqeyinin, tədbirin məqsədinin ictimaiyyətə çatdırılmasının qarşısını almaqdır», - deyə Əliyev Trend News-a bildirib.

Qurbanlı qeyd edib ki, hakim partiya ayrılan yerlərdə tədbirlər keçirməyi planlaşdırır.

Onun sözlərinə görə, YAP prezidentliyə namizədlərin təbliğat kampaniyası dövründə daha çox kiçik qruplar şəkilində görüşlərə üstünlük verəcək.

«YAP-ın seçki təbliğat-təşviqat kampaniyası yüksək səviyyədə hazırlanıb. Kampaniyanın əsas istiqaməti hər bir seçici ilə təmas qurmağa yönəlib. YAP-ın yerlərdə olan təşkilatları hər bir kənddə, qəsəbədə və məhəllədə görüşlər keçirəcək», - YAP rəsmisi vurğulayıb. /Trend/

2008 – ci il prezident seçkilərinə hazırlıq işlərinin monitorinqini həyata keçirən ATƏT – in müşahidəçilər qrupu Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) Lənkəran və Xaçmaz rayonlarında regional ofislərində olublar.

Hər iki görüşdə AVCİYA regional nümayəndəliklərin rəhbərləri qarşıdan gələn prezident seçkiləri ilə əlaqədar assosiasiyanın gördüyü işlər, o cümlədən respublika üzrə seçkilərin müşahidəsinin təşkili və “exit-poll”, “quick-count” tədqiqatı ilə bağlı görülən işlərlə ATƏT müşahidəçilərini tanış ediblər. ATƏT-in müşahidəçiləri AVCİYA və “ELS” təşkilatlarının Lənkəranda “exit-poll” və “quick-count”a aid keçirdiyi seminarda da iştirak ediblər.

Azərbaycanda Vətəndaş Cəmiyyətinin İnkişafına Yardım Assosiasiyası Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı müsabiqəsində qalib gəlmişdir. «Prezident və bələdiyyə seçkilərində seçici fəallığının artırılması, seçkilərin və şəffaf keçirilməsinə kömək məqsədilə maarifçilik işinin təşkili» adlı layihənin müddəti 5 aydır ( avqust – dekabr 2008).

Layihənin məqsədi vətəndaş cəmiyyəti quruculuğu, demokratik seçkilər sahəsində mövcud problemlərin aradan qaldırılması, bu sahədə demokratik islahatların həyata keçirilməsinə yardım etmək və qərbə inteqrasiyanın genişləndirilməsi işinə dəstək verməkdir. Bu sahədə vətəndaşların imkanlarından səmərəli istifadə edilməsi, onların cəmiyyət həyatında rolunun artırılmasına kömək göstərilməsi də layihənin əsas məqsədlərindədir. Bundan başqa Avropa İttifaqı ilə imzalanmış Fəaliyyət Planının real surətdə həyata keçirilməsinə kömək göstərmək də layihənin prioritetlərindəndir. Bunun üçün əhali arasında maarifçiliyi genişləndirilmək, demokratik seçkilər sahəsində mövcud problemləri öyrənmək və bu problemlərin həlli üçün tövsiyələr hazırlayıb müvafiq dövlət qurumlarına göndərmək nəzərdə tutulur.

Layihənin qarşıya qoyduğu məqsədə çatmaq üçün inkişaf etmiş ölkələrin təcrübəsini öyrənmək və əhali arasında geniş təbliğ etmək əsas vəzifələrdəndir. Bundan başqa Azərbaycanda seçkilərlə bağlı həyata keçirilmiş beynəlxalq layihələrdən əldə olunmuş müsbət təcrübənin də təbliği nəzərdə tutulur. Seçki Məcəlləsinin daha da demokratikləşdirilməsi üçün təkliflərin hazırlanması və bu sənədin əhali arasında təbliği də layihənin əsas vəzifələrindəndir.

Layihədən səs vermək hüququ olan bütün vətəndaşlar, o cümlədən seçkilərdə ilk dəfə səs verəcək gənclər faydalanacaqlar. Bundan başqa bir sıra problemlərə baxmayaraq seçkilərdə iştirakı özünün prioritet vəzifələrindən hesab edən siyasi təşkilatlar və vətəndaş cəmiyyəti institutları da layihədən bəhrələnəcəklər. Prezident və bələdiyyə seçkilərində iştirak edəcək namizədlərə seçicilərin fəallığının artırılmasında layihə yardımçı olacaq. Layihə həmçinin Azərbaycanın demokratik imicinin yüksəldilməsinə yaxından kömək edəcəkdir.

Azərbaycanda Vətəndaş Cəmiyyətinin İnkişafına Yardım Assosiasiyasının nümayəndələri ATƏT-in Demokratik Təsisatlar və İnsan Hüquqları Bürosunun Azərbaycan Respublikası Prezident Seçkilərinin Müşahidə Missiyası ilə görüş keçiriblər. AVCİYA tərəfdən görüşdə assosiasiyanın vitse-prezidenti Vəli Əlibəyov, ATƏT/DTİHB-dən isə Missiyanın rəhbəri, Səfir Boris Frlets, missiyanın hüquq üzrə təhlilçisi Fransin Beri və seçkilər üzrə təhlilçi Rumen Maleyev iştirak ediblər. Boris Frlets missiyanın məqsəd və vəzifələrindən danışarkən qeyd etdi ki, missiyanı seçkidə kimin qalib gələcəyi məsələsi maraqlandırmır. Onlar ancaq seçki prosesinin ATƏT-in prinsiplərinə uyğun keçirilməsinə nəzarət edəcəklər. Səfir Azərbaycanın şəffaf və demokratik seçkilər keçirmək üçün yaxşı qanunvericilik bazasına malik olduğunu qeyd edib.

AVCİYA-nın seçkidə görəcəyi işlərlə maraqlanan Səfir rayon və kəndlərdəki müşahidəçilərin yerli olduqlarını, yoxsa başqa rayonlardan göndəriləcəyi ilə maraqlanıb. Görüşdə AVCİYA-nın təmsilçisi bildirib ki, müşahidəçilər adəti üzrə öz yaşadıqları ərazidə müşahidə aparırlar. Bunu müsbət qiymətləndirən Səfir eyni zamanda yerli icra strukturlarının yerli müşahidəçilərə mümkün təzyiqlərin qarşısının alınmasının vacibliyini qeyd edib. AVCİYA-nın avqust ayından etibarən seçki prosesinin uzunmüddətli müşahidəsinin həyata keçirdiyini, bu məqsədlə ölkənin iqtisadi-siyasi vəziyyətinin təhlili, medianın, baş verən qanun pozuntularının monitorinqi üzərində işləməsini, seçki günü seçki məntəqələrinin hamısında müşahidə təşkil etmək, ekzit-pol və səslərin paralel hesablanması prosesini həyata keçirmək planları barədə məlumatlar Səfir Boris Frletsin marağına səbəb olub.

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) rəsmilərinin digər görüşü ATƏT-in Bakı ofisində baş tutub. AVCİYA Seçki Qərargahının rəhbəri Məhərrəm Zülfüqarlı təşkilatın məsul işçiləri Juliane Markard-Narten və Məryəm Hacı – İsmayılova ilə görüşüb.

M. Zülfüqarlı qarşıdan gələn prezident seçkiləri ilə bağlı assosiasiyanın gördüyü işlər barədə ətraflı məlumat verib. O, həmçinin AVCİYA-nın respublika üzrə seçkilərin müşahidəsinin təşkili və “exit-poll”, “quick-count” tədqiqatı ilə bağlı görülən işlərlə də ATƏT rəsmilərini tanış edib. Bundan başqa M, Zülfüqarlı AVCİYA Seçki Qərargahının 15 avqust-02 sentyabr 2008-ci il tarixində 12 regionda müşahidəçilər üçün keçirilmiş treninqlərin nəticələri haqqında da görüş iştirakçılarını məlumatlandırıb.

Juliane Markard-Narten ATƏT-in Bakı ofisinin prezident seçkiləri ilə bağlı gördüyü işlər barədə ətraflı məlumat verərək, seçki maarifçiliyi və seçkilərin monitorinqi ilə bağlı AVCİYA Seçki Qərargahı ilə əməkdaşlığa hazır olduqlarını bildirib. Görüşün sonunda hər iki təşkilatın seçkilərlə bağlı nəşr etdiyi kitablar iştirakçılara hədiyyə edilib.

AVCİYA-nın Mətbuat xidməti

Oktyabrın 15-də keçiriləcək prezident seçkilərini izləyəcək ATƏT-in uzunmüddətli Müşahidə Missiyasının üzvləri Azərbaycanın bölgələrinə ezam olunub, ümumilikdə 14 seçki qrupu yaradılıb. APA-nın məlumatına görə bu barədə Mərkəzi Seçki Komissiyasının (MSK) sədri Məzahir Pənahov məlumat verib. Onun sözlərinə görə, ATƏT müşahidəçiləri Bakı, Abşeron (3), Sumqayıt, Quba, Şamaxı, Gəncə (2), Bərdə, İmişli, Şirvan, Lənkəran, Şəki və Naxçıvana ezam olunublar. Qruplar adıçəkilən şəhərlərdə yerləşməklə ətraf rayonlarda yerləşən seçki dairələrində seçki prosesini izləyəcəklər.

O, MSK-nın müşahidəçilərlə əməkdaşlıq edəcəyini bildirib. ATƏT-in müşahidəçilərinə müraciət edən M. Pənahov çatışmazlıqlarla bağlı MSK-ya dərhal müraciət edilməsini xahiş edib: “Biz bu problemləri dərhal aradan qaldıracağıq. Güman etmirəm ki, ortaya ciddi problemlər çıxsın və biz onları həll edə bilməyək. Seçki prosesinə problem yaradan, pozuntulara yol verən komissiya üzvləri tərəfimizdən cəzalandırılacaq”./APA/

“Seçki təbliğatının aparılması məqsədi ilə seçicilərlə görüşlərin keçirilməsi üçün bütün seçki dairələrində müvafiq yerlər ayrılıb və yaxın günlərdə həmin yerlərin siyahısı MSK-nın internet saytında yerləşdiriləcək”. APA-nın məlumatına görə, bunu Mərkəzi Seçki Komissiyasının (MSK) sədri Məzahir Pənahov deyib. Onun sözlərinə görə, seçkilərdə istənilən maraqlı tərəf bu ünvanlarda görüşlər keçirə bilər. Təşviqat materiallarının yapışdırılması üçün də bütün seçki məntəqələrində yerlərin müəyyənləşdirildiyini qeyd edən MSK sədri bildirib ki, bu dəfə plakatlar xüsusi lövhələrə yapışdırılacaq: “Namizədlərin təşviqatı üçün MSK xüsusi lövhələr hazırlayıb, və bütün məntəqələri təmin edib. Həmin məntəqələrdən kənarda plakatların yapışdırılmasına icazə verilməyəcək. Plakatların isə fərqi var. MSK-nın çağırış plakatları insanların çox olduğu yerlərdə, vitrinlərdə yapışdırılıb. Plakatların tarixi binalara yapışdırılması qadağandır”.

Bəzi müxalifət partiyaları tərəfindən prezident seçkilərinin nəticələrinin indidən qeyri-legitim hesab olunmasına gəldikdə, M. Pənahov bildirib ki, bu, əsassız fikirdir: “Biz seçki ilə məşğulluq. Seçkilər keçiriləcək, onun nəticələri olacaq, nəticələr araşdırılacaq və bu nəticələr Konstitusiya Məhkəməsinə göndəriləndən sonra orada da araşdırılacaq və müvafiq qərardan sonra cənab prezidentin inauqurasiya mərasimi keçirəcək. Bütün proses bundan ibarətdir. İndi kimlərsə başqa məsələlər danışırsa, MSK-nın elə bir səlahiyyəti yoxdur ki, onların danışmağına məhdudiyyət qoysun”./APA/

Mərkəzi Seçki Komissiyası (MSK) Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyevin prezidentliyə namizədliyini qeydə alıb. APA-nın məlumatına görə, bu barədə qərar qurumun bu gün keçirilən iclasında qəbul edilib. MSK katibi Natiq Məmmədov bildirib ki, Q. Həsənquliyev MSK-ya 84 seçki dairəsindən toplanmış 44 min 166 seçici imzası təqdim edib. İmzaların 41 min 125-i etibarlı, 3 041 isə etibarsız sayılıb.
“Yaşıl Siyasət” seçicilərin təşəbbüs qrupunun namizədi Mais Güləliyevin namizədliyinin qeydə alınmasından isə imtina edilib. N. Məmmədovun sözlərinə görə, M. Güləliyev MSK-ya 44 min 886 seçici imzası təqdim edib. MSK-nın işçi qrupu bu imzaların seçmə üsulu ilə 16 min 750-ni yoxlayıb. İmzalardan 7686-sı etibarsız hesab edilib. Etibarlı hesab olunan imzalarla yoxlanmamış imzalar isə 40 min seçici imzasından az olduğundan imzaların yoxlanması prosesi dayandırılıb. N. Məmmədov M. Güləliyevin həmçinin, gəlirləri ilə bağlı ümumi məlumat verdiyini, mənbələri göstərmədiyini, əmlakı ilə bağlı tam məlumat vermədiyini bildirib. Belə ki, yoxlama zamanı M. Güləliyevin adına olan VAZ-21011 markalı avtomobil əmlakı ilə bağlı təqdim etdiyi siyahıda göstərilməyib. Bunları nəzərə alan MSK üzvləri M. Güləliyevin namizədliyini qeydə almayıblar.
MSK üzvü Ramiz İbrahimov isə bildirib ki, prezidentliyə namizədliyini irəli sürmüş Arif Əliyev topladığı seçici imzalarının qəbul olunmasını xahiş edib. O, öz müraciətində bildirib ki, imzaları MSK-nın təyin etdiyi vaxtda – sentyabrın 5-i saat 18.00-a kimi quruma təqdim edə bilməyib. Buna baxmayaraq, o imzaların qəbul edilməsini istəyib. MSK üzvləri A. Əliyevin müraciətini əsassız hesab ediblər. /APA/

Oktyabrın 15-də keçiriləcək prezident seçkilərində namizədliyi Yeni Azərbaycan Partiyası (YAP) tərəfindən irəli sürülmüş İlham Əliyevi seçki kampaniyası dövründə 50 vəkil təmsil edəcək. APA-nın məlumatına görə, vəkil edilmiş şəxslər YAP-ın İdarə Heyətində təsdiq edildikdən sonra Mərkəzi Seçki Komissiyasına (MSK) göndərilib və burada da təsdiq olunub. İ. Əliyevin vəkillərinin tam siyahısı belədir:

1. Abdullayev Çingiz Akif oğlu, Azərbaycan Yazıçılar Birliyinin katibi;

2. Abdullayev Kamal Mehdi oğlu, Bakı Slavyan Universitetinin rektoru;

3. Abdullayev Kamal Mehman oğlu, Azərbaycan Dövlət Neft Akademiyasında kafedra müdiri;

4. Abıyev Ağacan Qulam oğlu, Azərbaycan Dövlət Bədən Tərbiyəsi və İdman Akademiyasının rektoru;

5. Abıyev Əhəd Mikayıl oğlu, Azərbaycan Respublikası Milli Məclisinin deputatı;

6. Abramov Yevda Sasunoviç, Azərbaycan Respublikası Milli Məclisinin deputatı;

7. Aslanov Novruzəli Davud oğlu, Azərbaycan Respublikası Milli Məclisinin deputatı;

8. Aslanova Rəbiyyət Nurulla qızı, Azərbaycan Respublikası Milli Məclisinin deputatı, İnsan Hüquqları Daimi komissiyasının sədri;

9. Cəfərov Nizami Qulu oğlu, Azərbaycan Respublikası Milli Məclisinin deputatı, Mədəniyyət Daimi Komissiyasının sədri;

10. Əlizadə Firəngiz Əliağa qızı, Azərbaycan Bəstəkarlar İttifaqının sədri;

11. Əlizadə Akif Ağamehdi oğlu, AMEA-nın vitse-prezidenti;

12. Əmiraslanov Əhliman Tapdıq oğlu, Azərbaycan Tibb Universitetinin rektoru;

13. Əsgərov Şahlar Qaçay oğlu, Bakı Dövlət Universitetinin professoru;

14. Hacıyev Şəmsəddin Hümmət oğlu, Azərbaycan Respublikası Milli Məclisinin deputatı, Elm və təhsil məsələləri Daimi komissiyasının sədri, Azərbaycan Dövlət İqtisad Universitetinin rektoru;

15. Hacıyeva Gültəkin Yunis qızı, Azərbaycan Respublikası Milli Məclisinin deputatı;

16. Heydərov Fəttah Səməd oğlu, Azərbaycan Respublikası Milli Məclisinin deputatı, Regional məsələlər Daimi komissiyasının sədr müavini;

17. Həbibbəyli İsa Əkbər oğlu, Azərbaycan Respublikası Milli Məclisinin deputatı;

18. Həsənov Ramil Sahib oğlu, YAP Gənclər Birliyinin sədri;

19. Həsənova Məlahət İbrahim qızı, Azərbaycan Respublikası Milli Məclisinin deputatı;

20. Hüseynov Əli Məhəmməd oğlu, Azərbaycan Respublikası Milli Məclisinin deputatı, Hüquq Siyasəti Daimi Komissiyasının sədri;

21. Hüseynov Rafael Baba oğlu, Azərbaycan Respublikası Milli Məclisinin deputatı;

22. Xanlarova Zeynəb Yəhya qızı, Azərbaycan Respublikası Milli Məclisinin deputatı;

23. Xəlilov Fərhad Qurban oğlu, Azərbaycan Rəssamlar İttifaqının sədri;

24. İbrahimov Eldar Rza oğlu, Azərbaycan Respublikası Milli Məclisinin deputatı, Aqrar siyasət komissiyasının sədri;

25. İsmayılov İmamverdi İbiş oğlu, Azərbaycan Respublikası Milli Məclisinin deputatı;

26. Kazımov Mirkazım Məhəmməd oğlu, Azərbaycan Respublikası Milli Məclisinin deputatı;

27. Qaralov Zahid İbrahim oğlu, YAP Səbael rayon təşkilatının sədri;

28. Qasımov Musa Cəfər oğlu, Bakı Dövlət Universitetinin professoru;

29. Quliyev Musa İsa oğlu, Azərbaycan Respublikası Milli Məclisinin deputatı;

30. Quliyev Ülvi Zahid oğlu, Azərbaycan Respublikası Milli Məclisinin deputatı;

31. Mahmudov Yaqub Mikayıl oğlu, Azərbaycan Respublikası Milli Məclisinin deputatı;

32. Möhbalıyev Səttar Suliddin oğlu, Azərbaycan Respublikası Milli Məclisinin deputatı;

33. Məcidov Rəşad Museyib oğlu, Azərbaycan Yazıçılar Birliyinin katibi;

34. Məhərrəmov Abel Məmmədəli oğlu, Azərbaycan Respublikası Milli Məclisinin deputatı, BDU-nun rektoru, AMEA-nın həqiqi üzvü;

35. Məmmədəliyev Vasim Məmmədəli oğlu, Bakı Dövlət Universitetinin dekanı;

36. Məmmədov Elman Camal oğlu, Azərbaycan Respublikası Milli Məclisinin deputatı;

37. Məmmədova Gülçöhrə Hüseyn qızı, Azərbaycan Memarlıq və İncəsənt Universiteinin rektoru;

38. Mirzəzadə Aydın Böyükkişi oğlu, Azərbaycan Respublikası Milli Məclisinin deputatı;

39. Məmmədli Elnur Çingiz oğlu, Azərbaycan Dövlət Bədən Tərbiyəsi və İdman Akademiyasının tələbəsi;

40. Naxçıvanlı Aqiyə Həbib qızı, Azərbaycan Müəllimlər İnstitutunun rektoru;

41. Osmanov Ceyhun Yunus oğlu, İrəli Ümumrespublika Gənclər Hərəkatının həmtəsisçisi;

42. Rəcəbli Hadı Musa oğlu, Azərbaycan Respublikası Milli Məclisinin deputatı, Sosial siyasət daimi komissiyasının sədri;

43. Rəhimzadə Arif Qafar oğlu, Azərbaycan Respublikası Milli Məclisinin deputatı, Regional məsələlər Daimi komissiyanın sədri;

44. Rzayev Rövşən Şükür oğlu, Azərbaycan Respublikası Milli Məclisinin deputatı;

45. Rzayev Anar Rəsul oğlu, Azərbaycan Yazıçılar Birliyinin sədri;

46. Sadıqov Bəxtiyar Yusif oğlu, Azərbaycan Respublikası Milli Məclisinin deputatı;

47. Seyidov Səməd İsmayıl oğlu, Azərbaycan Respublikası Milli Məclisinin deputatı, Beynəlxalq əlaqələr və parlamentlərarası daimi komissiyasının sədri;

48. Vəkilov Vaqif Səməd oğlu, Azərbaycan Respublikası Milli Məclisinin deputatı;

49. Yaqublu Zəlimxan Yusif oğlu, xalq şairi;

50. Zabelin Mixail Yuryeviç, Azərbaycan Respublikası Milli Məclisinin deputatı. /APA/