Seçkiləri müşahidə edən “Seçki 2008” QHT Koalisiyası səsvermənin başa çatması ilə bağlı məlumat yayıb. Koalisiyadan APA-ya bildirilib ki, əksər məntəqələr vaxtında bağlanıb. Bununla belə məntəqələrin bağlanması zamanı bir sıra prosedur pozuntular qeydə alınıb. Belə ki, bəzi məntəqələrdə səsvermənin bitdiyi rəsmən elan edilsə də, içəri giriş-çıxış tam dayandırılmayıb. Səsvermə bitdikdən, yəni saat 19.00-dan sonra məntəqələrə adamların daxil olması müşahidə edilib. Bu hallar hətta veb-kameralarda da aydın görünüb (məsələn, 34 saylı II Xətai Seçki Dairəsinin 15-ci məntəqəsi).

Gün ərzində bir çox seçki komissiyasında üzvlərin peşəkarlığının aşağı olması müşahidə edilib. Xüsusən də məntəqələrin bağlanması və səslərin sayılmasına başlanması zamanı dərhal qutuların açılması və bülletenlərin sayılmasını bura aid etmək olar.

Koalisiyanın müşahidəçilərinə qarşı xüsusi təzyiq halları müşahidə edilməyib (bir hal istisna olmaqla). Bundan başqa, müşahidəçilərin normal işləməsi üçün şərait təmin edilib və onların öz vəzifələrini icra etməsində əngəllərə rast gəlinməyib.

Səsvermə prosesində bəzi adamların qrup halında avtobuslarla məntəqələrə daşınması müşahidə olunub. Koalisiyanın müşahidəçilərinin araşdırmalarından sonra bəlli olub ki, nisbətən uzaq məsafədə yaşayan məcburi köçkünlər üçün nəqliyyat təşkil edilib.

“Seçki 2008” QHT Koalisiyasının müşahidə etdiyi seçici fəallığı aşağıdakı kimi olub: saat 10.00 üçün 15,1%, saat 12.00 üçün 31,7%, saat 15.00 üçün 51,9%, saat 17.00 üçün 62% və saat 19.00 üçün 68,3%./APA/