|
Hazırda ölkənin siyasi həyatında elə də nəzərəçarpacaq aktivlik olmasa da, partiyalarda qarşıdakı bələdiyyə seçkilərinə hazırlıq gedir. Hələlik müxalifət partiyaları seçkilərə birlikdə, yaxud ayrı getmək barədə qərar qəbul etməyiblər, lakin bu istiqamətdə müzakirələr aparmaqla bərabər, hər biri öz daxilində namizədlərin müəyyənləşdirilməsi prosesinə başlayıb. Artıq demək olar ki, bəziləri bu işi başa çatdırmaq üzrədir. Bələdiyyə seçkilərində hər partiya neçə namizədlə iştirak edəcək? Bu seçkilərdə qələbə qazanmaq müxalifətə nə verər? Seçkilərin nəticələri bələdiyyələrin maliyyələşməsinə təsir edə bilərmi?Ümid Partiyasının funksioneri Nəsimi Məmmədli bildirdi ki, hazırda 3700-dən artıq namizəd müəyyənləşib, lakin bu proses davam edir: “Artıq partiyada daimi seçki qərargahının iş planı hazırlanıb. Namizədlərə lazım olan sənədlərin, hüquqi-normativ sənədlərin hazırlanması tamamlanmaq üzrədir. Partiya kimi bu istiqamətdə işlərimiz qənaətbəxşdir. Blok çərçivəsində də üzərimizə düşən işi yerinə yetirməyə çalışacağıq”. Ümid yetkilisinə görə, indiyə qədər bələdiyyələrdə müxalifətin birbaşa fəaliyyətinin olmaması seçkilərdə uğursuzluqlara səbəb olan amillərdəndir: “Biz müxalifət olaraq bələdiyyə seçkilərində iştirak edib seçilmiş üzvlərimizlə çox ciddi konseptual məsələləri həyata keçirmək niyyətindəyik. Bununla bağlı artıq proqram da hazırlanıb”.
Müsavat Partiyası Mərkəzi İcra Aparatının rəhbəri Arif Hacılının sözlərinə görə, namizədlərin müəyyənləşdirilməsi prosesi hələ davam edir. Müsavat yetkilisi qeyd etdi ki, partiya irəli sürəcəyi namizədlərin xüsusilə nüfuzlu şəxslər olmasına önəm verir: “İnanırıq ki, bu cür adamların qələbəsi asan olacaq. Çalışacağıq ki, ölkə üzrə bələdiyyələrin mütləq əksəriyyətindən namizədlərimizi irəli sürək. Eyni zamanda, müəyyən bələdiyyələrdə nümayəndələrimizin bələdiyyə başqanı seçilməsinə çalışacağıq”. A.Hacılı bildirdi ki, əslində ölkədə normal demokratik cəmiyyət olsaydı, bələdiyyə seçkilərinin siyasi partiyaların maliyyələşməsinə təsiri təklifi normal qarşılanardı: “Çünki siyasi partiyaların gücü onların seçkilərdə aldığı səslərlə müəyyən edilməlidir. Düşünürəm ki, bu, kriteriyalardan biri olmalıdır”.
DUİ yetkilisi Pənah Hüseyn bildirdi ki, hələlik təşkilat daxilində seçkilərdə iştirak edib-etməmək barədə fikir ayrılığı var və yaxın günlərdə konkret qərar qəbul ediləcək. DUİ hazırda bələdiyyələr üzrə namizədlərin müəyyənləşdirilməsini həyata keçirir. İlkin rəqəmlərə görə, əksəriyyəti KXCP-dən olmaqla təxminən 2000 nəfərə yaxın namizəd müəyyənləşib: “Bilirsiniz ki, bələdiyyələrin birləşdirilməsi ilə bağlı qərar verildi, kiçik ölçülü adına böyük bələdiyyələr də birləşdirildi. Məsələn, mənim təmsil etdiyim Sabirabad rayonunda 80-dən yuxarı bələdiyyə vardı, indi 24-25 bələdiyyə qalıb. Namizədlərin bu çərçivədə müəyyən edilməsi yeni problemlər yaradıb. Yəqin ki, bir neçə günə bu məsələ həllini tapacaq”. P.Hüseynə görə, normal bələdiyyə institutu mövcud olarsa, bələdiyyələrdə çoxluq qazanmaq müxalifətin müəyyən məsələlərdə uğur qazanmasına səbəb olar: “Lakin hələlik bizdə bələdiyyəçilik formalaşmayıb. Açığı buna görə də bələdiyyə seçkilərində iştiraka o qədər maraq və həvəs yoxdur”.
/musavat.az/
| 
