|
"Siyasi partiyalar haqqında" qanuna və Seçki Məcəlləsinə əlavə və dəyişikliklərin edilməsi bələdiyyə seçkilərinə qədər mümkün olmayacaq. Bu barədə qəzetimizə Yeni Azərbaycan Partiyasının (YAP) icra katibinin müavini, millət vəkili Siyavuş Novruzov məlumat verdi. O qeyd etdi ki, bir müddət öncə işini başa vurmuş parlamentin növbədənkənar sessiyası zamanı təmsilçisi olduğu YAP adından "Siyasi partiyalar haqqında" qanunun dəyişdirilməsi təklifi ilə çıxış edib. O cümlədən parlamentin növbədənkənar sessiyasının sonuncu iclaslarından birində də bu məsələni yenidən gündəmə gətirib: "Bu məsələni gündəmə gətirməkdə də məqsədimiz o idi ki, ən azı növbəti bələdiyyə seçkilərinə kimi sözügedən qanuna baxılsın, orada müəyyən dəyişikliklər edilsin. Eyni zamanda, biz istəyirik ki, Seçki Məcəlləsinə də bələdiyyə seçkiləri ilə bağlı müəyyən dəyişikliklər olunsun. Ancaq özünüz də bildiyiniz kimi, parlamentin növbəti payız sessiyası ilə bələdiyyə seçkiləri təxminən eyni vaxta təsadüf edir. Ona görə istər "Siyasi partiyalar haqqında" qanuna, istərsə də Seçki Məcəlləsinə dəyişiklikləri bələdiyyə seçkilərinə kimi reallaşdırmaq mümkün olmayacaq". S.Novruzov dedi ki, müvafiq Seçki Məcəlləsi ilə bələdiyyə seçkilərinə rəsmi hazırlığa seçki gününə 75 gün qalmış icazə verilir. Yəni bələdiyyə seçkilərinə hazırlığa rəsmi start verilməsi sentyabrın sonları, oktyabrın əvvəllərinə təsadüf edir. Parlamentin payız sessiyası isə oktyabrın 1-də başlayacaq. Odur ki, ən azı Seçki Məcəlləsinə nəzərdə tutulan dəyişiklikləri bələdiyyə seçkilərinə kimi reallaşdırmaq mümkün olmayacaq: "Bununla belə, güman edirəm ki, payız sessiyasının gedişatı zamanı həm Seçki Məcəlləsinə dəyişikliklərə, həm də "Siyasi partiyalar haqqında" qanuna dəyişikliklərə baxmaq və onları reallaşdırmaq olar. Bir sözlə, qarşıdan gələn parlament seçkilərinə "Siyasi partiyalar haqqında" yeniləşdirilmiş qanunla getmək mümkündür".
Məqamı düşmüşkən, görəsən, bir millət vəkili və YAP yetkilisi olaraq S.Novruzov şəxsən "Siyasi partiyalar haqqında" qanunu necə görür? Millət vəkilinin qeyd etdiyinə görə, "Siyasi partiyalar haqqında" qanunda çox böyük blok dəyişikliklər olmalıdır. Özü də orada tək bir dəyişiklikdən söhbət getməməlidir. Orada edilməli olan çoxlu dəyişiklik var ki, əslində, onları da bir neçə qrupa bölmək olar: "Məsələn, siyasi partiyaların qeydiyyatdankeçmə prosedurundan tutmuş onların fəaliyyətinə, dövlət tərəfindən maliyyələşdirilməsinə, beynəlxalq təşkilatlarla əməkdaşlığa, onlarda təmsilçilik məsələsinə və digər məsələlərə qədər bütün məqamlar dəyişikliklərdə mütləq nəzərə alınmalı və reallaşdırılmalıdır. Məhz bu baxımdan, biz YAP olaraq belə hesab edirik ki, "Siyasi partiyalar haqqında" mövcud qanuna ciddi dəyişikliklər edilməli, hətta lazım gələrsə, qanun bütövlükdə yeniləşdirilməlidir. Bu dəyişikliklərin edilməsi, təkmilləşdirilmənin aparılması olduqca vacibdir və zəruridir".
Yuxarıda da qeyd olunduğu kimi, qarşıdan növbəti bələdiyyə və onun ardınca 2010-cu il növbəti parlament seçkiləri gəlir. Bu baxımdan, YAP-ı bu seçkilərə tam hazır hesab etmək olarmı? S.Novruzovun sözlərinə görə, YAP hər iki seçkiyə, xüsusilə bələdiyyə seçkilərinə - seçkilərə hazırlığa rəsmi start verilməsə belə - tam hazırdır. YAP özünün Proqram və Nizamnaməsinə uyğun olaraq bələdiyyə seçkilərinə hazırlıqla bağlı lazım olan bütün işləri görüb. Yəni bu yöndə müvafiq müşavirə keçirilib, bununla bağlı partiyanın İdarə Heyətinin müvafiq qərarı verilib. Həmçinin yerlərdə müvafiq seçki qərargahları yaradılıb və onların üzvləri artıq fəaliyyət göstərməkdədirlər: "Bununla yanaşı, biz ümumiləşdirilmiş şəkildə şüarlarımızı və seçki proqramımızı işləməkdəyik, hazırda bunların üzərində iş aparılır. Bələdiyyə seçkilərinin rəsmi hazırlığı çərçivəsində, qanunun müəyyən etdiyi zamanda biz həmin seçki proqramımızı və əsas istiqamətlər üzrə şüarlarımızı bəyan edərək bu yöndə lazımi təşviqat işlərini də quracağıq".
/kaspi.az/
| 
