Dünən Avropa Şurası (AŞ) Venesiya Komissiyası 2008-ci il üçün illik hesabatını açıqlayıb. APA-nın Avropa bürosunun xəbərinə görə, hesabatın açıqlandığı brifinqdə Venesiya Komissiyasının prezidenti Jan Helgesen, katibi Canni Bukkikio, qurumun mətbuat katibi Tatyana Mişelova və digər şöbələrin müdirləri iştirak ediblər. Hesabat dövründə ayrı-ayrı ölkələr üzrə 36 rəy qəbul olunub. Bu müddətdə ümumi məsələləri əhatə edən 7 mətn qəbul edilib, 27 seminar və konfrans keçirilib.

Venesiya Komissiyasının fəaliyyəti, əsasən, Albaniya, Əlcəzair, Ermənistan, Azərbaycan, Belarus, Bosniya və Herseqovina, Bolqarıstan, Gürcüstan, Qazaxıstan, Qırğızıstan, Moldova, Çernoqoriya, Fələstin, Rusiya, Serbiya, Slovakiya, Makedoniya, Türkiyə, Ukrayna və Finlandiya ilə bağlı olub.

Venesiya Komissiyasının prezidenti Jan Helgesen Azərbaycanla son əməkdaşlığın Konstitusiyaya dəyişikliklər edilməsi ilə bağlı keçirilmiş referendum aktı layihəsi ilə bağlı olduğunu deyib. O bildirib k, komissiyanın bununla bağlı rəyi olub.

Konstitusiya dəyişikliklərinin vacib olduğunu və bunun cəmiyyətə gərəkliliyini vurğulayan qurum prezidenti Azərbaycan hökumətinin Venesiya Komissiyasının rəyinə verdiyi reaksiyanın qənaətbəxş olmadığını söyləyib: "Biz mart ayında verdiyimiz rəyin Azərbaycan üçün çox həssas olduğunu yaxşı anlayırıq. Amma biz məsələyə Avropa dəyərləri baxımından yanaşdıq və üzərimizə düşən vəzifəni yerinə yetirərək lazımi mesajı göndərdik".

Azərbaycanla Venesiya Komissiyası arasındakı əməkdaşlığın yenidən canlanacağına ümid etdiyini deyən J.Helgesen bildirib ki, gələcəkdə Azərbaycan hökuməti və ya Avropa Şurasının hər hansı qurumundan Azərbaycan qanunvericiliyinə dair rəy vermək üçün təklif olarsa, qurum əməkdaşlığa məmnuniyyətlə hazırdır: "Sadəcə, Azərbaycanın da bu əməkdaşlıqdan irəli gələn öhdəlikləri yerinə yetirməsinə ehtiyac var".

Venesiya Komissiyasının katibi Canni Bukikio isə bildirib ki, referendumla bağlı akta rəy verilməsini komissiyadan Azərbaycan hökuməti deyil, Avropa Şurası Parlament Assambleyası istəyib: "Azərbaycanla bir çox sahədə yaxşı əməkdaşlığımız olub. Lakin sonuncu rəylə bağlı Azərbaycanın mövqeyi bizi məyus etdi, rəydə göstərilən bir çox müddəa qəbul edilmədi. Bizim isə ölkələrə rəylərimizi qəbul etdirəcək siyasi gücümüz yoxdur. Biz rəyi veririk və bunu ölkənin öz üzərinə buraxırıq, məsələni isə Avropa Şurasının digər strukturları monitorinq edir. Bununla belə, çox ümid edirəm ki, gələcəkdə Azərbaycan hökuməti ilə daha da yaxşı əməkdaşlıq edəcəyik. Azərbaycan hökumətindən Konstitusiyaya edilmiş dəyişikliklərin qüvvəyə minməsinə dair rəy üçün təklif gözləyirik".