Mərkəzi Seçki Komissiyasının (MSK) növbəti iclası keçirilib. APA-nın məlumatına görə, iclasda “Qarabağ və Respublika Uğrunda” təşviqat qrupunun 18 səlahiyyətli nümayəndəsi, 25 vəkili, “Respublikaçılar” təşviqat qrupunun isə 24 səlahiyyətli nümayəndəsi və 25 vəkili təsdiq olunub. MSK-nın keçmiş üzvü Ənvər Əliyev “Qarabağ və Respublika Uğrunda” təşviqat qrupunun, vəkil Osman Kazımov isə “Respublikaçılar” təşviqat qrupunun MSK-da məşvərətçi səs hüquqlu üzvləri kimi təsdiq edilib.
İclasda “Respublikaçılar” təşviqat qrupunun səlahiyyətli nümayəndəsi Gülağa Aslanlının müraciətinə də baxılıb. MSK üzvü Ramiz İbrahimovun sözlərinə görə, G. Aslanlı müraciətində bildirib ki, təşviqat qrupunun pulsuz təbliğat-təşviqat aparmaq hüququ “Xalq Qəzeti” tərəfindən pozulub, qəzet qrupun təqdim etdiyi materialın başlığını dəyişməklə dərc edib. R. İbrahimov məsələnin araşdırıldığını, qəzet rəhbərliyinə sorğu göndərildiyini bildirib. Sorğuya cavab olaraq qəzetin redaksiyası başlığın dəyişməsinin texniki səhv olduğunu açıqlayıb. MSK yol verilmiş pozuntunun qəzet tərəfindən aradan qaldırılması barədə qərar qəbul edib./APA/