“Respublikaçılar” və “Qarabağ və Respublika Uğrunda” təşviqat qrupları seçkiqabağı təbliğat-təşviqat kampaniyası çərçivəsində seçicilərlə qapalı zallarda görüşlərə başlayacaq. Müsavat Partiyasının Mərkəzi İcra Aparatının rəhbəri Arif Hacılının APA-ya verdiyi məlumata görə, gələn həftədən paytaxtda və bir sıra rayonlarda belə görüşlərin keçirilməsi nəzərdə tutulub. Təşviqat qrupları ilk görüşlərini martın 1-də “Təbriz” kinoteatrında keçirəcəklər. A. Hacılının sözlərinə görə, bununla bağlı Təşviqat qrupları Mərkəzi Seçki Komissiyasına müraciət ediblər...

Mərkəzi Seçki Komissiyasının (MSK) növbəti iclası keçirilib. APA-nın məlumatına görə, iclasda “Qarabağ və Respublika Uğrunda” təşviqat qrupunun 18 səlahiyyətli nümayəndəsi, 25 vəkili, “Respublikaçılar” təşviqat qrupunun isə 24 səlahiyyətli nümayəndəsi və 25 vəkili təsdiq olunub. MSK-nın keçmiş üzvü Ənvər Əliyev “Qarabağ və Respublika Uğrunda” təşviqat qrupunun, vəkil Osman Kazımov isə “Respublikaçılar” təşviqat qrupunun MSK-da məşvərətçi səs hüquqlu üzvləri kimi təsdiq edilib...

Martın 18-də keçiriləcək referendumla bağlı indiyə qədər seçki komissiyalarında 11 min 230 müşahidəçi qeydə alınıb. APA-nın məlumatına görə, bu barədə Mərkəzi Seçki Komissiyasının sədri Məzahir Pənahov məlumat verib. Müşahidəçilərin 566-sı MSK-da, 10 min 664-ü isə dairə seçki komissiyalarında qeydiyyata alınıb. MSK-da qeydiyyatdan keçən müşahidəçilər ölkə ərazisindəki istənilən seçki məntəqəsində, DSK-lara müraciət edən müşahidəçilər isə həmin DSK-nın ərazisindəki seçki məntəqələrində müşahidə apara biləcəklər./APA/

MBD müşahidəçilər missiyası Azərbaycan Konstitusiyasına əlavə və dəyişikliklər edilməsi üzrə referendumun gedişini müşahidə edəcək. “İcraiyyə Komitəsinin sədri - MDB-nın icraçı katibi Toktasın Buzubayevin rəhbərlik etdiyi nümayəndə heyəti martın 6-19-u aralığında Azərbaycanda olacaq”, - Trend News-a çərşənbə axşamı, Minskdən telefonla İcra Komitəsinin mətbuat katibi Mariya Qutsalo bildirib. Martın 18-də Azərbaycanda Konstitusiyanın 29-cu maddəsinə əlavə və dəyişikliklərin edilməsi üzrə referendum keçiriləcək. Azərbaycan Konstitusiyası 1995-ci ildə qəbul edilib, 2002-ci ildə Əsas Qanuna əlavə və dəyişikliklər edilib. MBD müşahidəçilər missiyası Azərbaycan Konstitusiyasına əlavə və dəyişikliklər edilməsi üzrə referendumun gedişini müşahidə edəcək...

Azərbaycanın 10 siyasi partiyası Ermənistanın Azərbaycan qarşı hərbi təcavüzü və Qarabağın işğal edilməsi ilə bağlı BMT-nin Təhlükəsizlik Şurasına, Avropa Parlamentinə, ATƏT-ə, AŞ PA-ya, ABŞ prezidenti Barak Obamaya, Rusiya prezidenti Dimitri Medvedevə, Fransa prezidenti Nikola Sarkoziyə və Azərbaycandakı xarici ölkə səfirliklərinə müraciət edib. APA-nın məlumatına görə, müraciətdə bildirilir ki, Ermənistan Rusiya hərbi hissələrinin köməyi ilə həyata keçirdiyi irimiqyaslı hərbi əməliyyatlar nəticəsində Azərbaycanın Dağlıq Qarabağ bölgəsini və onun ətrafındakı 7 rayonunu işğal edib, eyni zamanda həmin ərazilərdə etnik təmizləmə həyata keçirib, 1 milyondan artıq azərbaycanlını ev-eşiyindən didərgin salıb. Bununla bağlı BMT Təhlükəsizlik Şurası 1993-cü ildə erməni silahlı birləşmələrinin dərhal və qeyd-şərtsiz olaraq işğal olunmuş Azərbaycan ərazilərindən çıxarılması haqqında 4 qətnamə qəbul edib...

Azərbaycanda referendumla bağlı təbliğat aparacaq təşviqat qruplarının hər birinə 23 min manat vəsait ayrılacaq, Trend News-un məlumatına görə, çərşənbə günü keçirilən iclasda Mərkəzi Seçki Komissiyasının (MSK) sədri Məzahir Pənahov bildirib. “Buna baxmayaraq, qanunvericilik hər bir təşviqat qrupunun 4 mln. manata qədər ianə toplamasına da imkan verir”, - Pənahov əlavə edib.Referendum üzrə təşviqat qrupları fevralın 18-dən etibarən təbliğat kampaniyasına start verəcəklər. Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.

Azərbaycanın hakim partiyası hesab edir ki, referendumla bağlı qeydiyyatdan keçən müxalif qüvvələrin təsis etdikləri təşviqat qrupları təbliğat kampaniyası zamanı qanunun tələblərinə əməl etməlidir. “Qanuna müvafiq olaraq, Bakının 11 rayonunun hər birində təbliğat kampaniyası zamanı açıq və qapalı tədbirlərin keçirilməsi üçün müvafiq yerlər ayrılıb. Müxalifətin hər hansı tədir keçirməsi üçün digər yerləri tələb etməsi qanunlara hörmətsizlikdir” - Trend News-un məlumatına görə, çərşənbə günü hakim Yeni Azərbaycan Partiyası (YAP) icra katibinin müavini, “Yeni Azərbaycan” təşviqat qrupunun səlahiyyətli nümayəndəsi, millət vəkili Siyavuş Novruzov bildirib.
Təşviqat qrupları fevralın 18-dən etibarən təbliğat kampaniyasına start veriblər. Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.

Azərbaycanın müxalif partiyasının referendumla bağlı təsis etdiyi təşviqat qrupu televiziya və radioda pulsuz efir vaxtının az ayrılmasına etiraz edir. “Bizim etirazlara baxmayaraq nə efir vaxtının həcmində, nə çıxışların efirə verilmə zamanında, nə də çıxışların formatında heç bir dəyişiklik edilməyib”, - çərşənbə günü TrendNews-a “Respublikaçılar” təşviqat qrupunu təsis edən Müsavat Partiyasından bildirilib.
Təşviqat qrupları fevralın 18-dən etibarən təbliğat kampaniyasına start veriblər.
Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib.

Mərkəzi Seçki Komissiyasının (MSK) sədri Məzahir Pənahov təşviqat qruplarını referendumla bağlı ayrılmış ödənişsiz efir vaxtından səmərəli istifadə etməyə çağırıb. APA-nın məlumatına görə, MSK sədri jurnalistlərə açıqlamasında bildirib ki, ödənişsiz efir vaxtı yalnız referenduma çıxarılan 29 maddəyə təklif olunan 41 əlavə və dəyişikliyin müzakirəsi üçün ayrılıb: “Təşviqat qruplarının nümayəndələri bilməlidirlər ki, orada başqa məsələlərin müzakirə olunması qəti yolverilməzdir. Qanunun tələbinə əsasən efir vaxtı yalnız həmin məqsəd üçün istifadə olunmalıdır”.

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) 18 mart 2009–cu il tarixidə keçiriləcək refendumla bağlı geniş fəaliyyət proqramını mərhələlər üzrə həyata keçirir. Bununla bağlı AVCİYA Seçki Qərargahı referenduma hazırlıq mərhələsini, referendum gününü və referendumdan sonrakı proseslərin monitorinqini həyata keçirmək üçün yanvar ayının 10–dan intensiv fəaliyyətə başlayıb. Monitorinq prosesində 15 qəzet («Azərbaycan», «Yeni Azərbaycan», «Üç nöqtə», «Həftə içi», «Xalq cəbhəsi», «Ədalət», «Şərq», «Səs», «Yeni Müsavat», «Azadlıq», «Bizim yol», «Exo», «Zerkalo», «Ekspress», «525-ci qəzet») və 4 telekanalın (İTV, Az.TV, ANS, Lider) fəaliyyətinin də müşahidəsi həyata keçirilir.