Ümumrusiya Azərbaycanlıları Konqresi Azərbaycanda keçiriləcək prezident seçkiləri ilə bağlı Moskvada aksiya keçirib.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bazar ertəsi Trend News-a verilən məlumata görə, konqresin prezidenti Məmməd Əliyev aksiyada seçkilərdə Azərbaycan diasporunun fəal iştirakı üçün gördüyü işlərdən danışıb.

«Konqresin regional təşkilatlarının liderləri prezident seçkilərində fəal iştirak etməyə hazır olduqlarını bildiriblər», - Əliyev deyib.

Tədbirdə seçkilərdə iştiraka dair müraciət qəbul olunub. Müraciətdə prezident İlham Əliyevin 5 il ərzində Azərbaycan dövlətinin hərtərəfli inkişafı və beynəlxalq aləmdə nüfuzunun artırılması, eləcə də Azərbaycan-Rusiya münasibətlərinin daha da möhkəmlənməsinə verdiyi töhfələr, Rusiyada yaşayan soydaşlarımızın hüquqlarının qorunması, onların problemlərinin həlli, Rusiyadakı Azərbaycan diasporunun təşkilatlanması, keyfiyyətcə daha yüksək mərhələyə qədəm qoyması məqsədilə gördüyü işlərdən bəhs olunur.

Sənəddə qeyd edilir ki, Ümumrusiya Azərbaycanlıları Konqresinin Rəyasət Heyəti Rusiyadakı 2 milyonluq Azərbaycan diasporunun İlham Əliyevin prezidentliyə namizədliyini dəstəklədiyini bildirir və bu ölkənin ərazisində yaşayan, işləyən, təhsil alan bütün Azərbaycan vətəndaşlarını seçkilərdə fəal iştirak etməyə çağırır. /Trend/

«Azərbaycanda Vətəndaş Cəmiyyətinin Inkişafına Yardım Assosiasiyası» (AVCİYA) Seçki Qərargahı Prezident seçkiləri ərəfəsi Respublikanın 12 regional mərkəzində müşahidəçilərə treninqləri başa vurduqdan sonra Bakı rayonları, Abşeron və Sumqayıt müşahidəçiləri üçün treniqlərə başlayıb. 4-12 oktyabr 2008 – ci il tarixlərini əhatə edən treninqlər zamanı müşahidəçilərə AVCİYA Seçki Qərəgahının hazırladığı “2008 – ci il Prezident seçkilərinin Monitorinqi. Yaddaş kitabçası”, seçki günü lazım olan materiallarla təmin olunmuş qovluqlar təqdim olunur.
Seçki Qərargahı Prezident seçkiləri ərəfəsi iş planına uyğun olaraq öz fəaliyyətini daha da genişləndirir.

Bu gün Azərbaycanda Vətəndaş Cəmiyyətinin İnkişafına Yardım Assosiyası (AVCİYA) Seçki Qərargahının rəhbəri Məhərrəm Zülfüqarlı Prezidentliyə namizəd İqbal Ağazadə ilə görüşüb.

İqbal Ağazadə AVCİYA ilə əmədaşlıq edən ELS təşkilatının keçirdiyi rəy sorğusu barədə fikirini bildirmiş, seçki kampaniyasının gedişi, keçirdiyi görüşlər, seçki təbliğatı barədə məlumat vermiş və təbliğat materialları ilə AVCİYA rəsmisini tanış etmişdir.

M. Zülfüqarlı Assosiasiyanın Prezident seçkiləri ilə əlaqədar gördüyü işlər və gələcək fəaliyyəti barədə qısa məlumat verib.

Görüşün sonunda M. Zülfüqarlı Prezidentliyə namizədi AVCİYA – nın 9 oktyabr 2008 – ci il tarixdə kecirəcəyi Dəyirmi Masaya dəvət etmişdir.

Azərbaycanın müxalif Müsavat Partiyası Azərbaycan Demokrat Partiyası ilə hansısa blokda birləşməsini mümkün saymır.
«Müxalifətdə olan siyasi partiyaların əməkdaşlığını və imkan daxilində müttəfiqliyini dəstəkləyirik, ancaq yaxın zamanlarda bizim Azərbaycan Demokrat Partiyası ilə hansısa blokda birləşməyimiz real görünmür», - cümə günü TrendNews - a Müsavat Partiyası Mərkəzi İcra Aparatının rəhbəri Arif Hacılı bildirib.

Hacılı ADP - nin prezident seçkilərinə münasibətinin Müsavatdan tamamilə fərqli olduğunu qeyd edib.

«Bütövlükdə Azərbaycan hakimiyyətinin siyasəti ilə əlaqədar ADP - nin mövqeyi Müsavat Partiyasının mövqeyindən əsaslı surətdə fərqlənir. Bu fərq o qədərdir ki, iki partiyanın müttəfiqliyi mümkün deyil», - Hacılı bildirib

Müsavatın Mərkəzi İcra Aparatının rəhbəri, yalnız iki partiyanın siyasətində daha yaxın çalarlar aşkara çıxdığı təqdirldə əməkdaşlığı, hətta ciddi blok yaradılmasını mümkün hesab edir. /Trend/

Azərbaycanın xarici ölkə səfirliklərində ölkədə keçiriləcək prezident seçkisi ilə əlaqədar seçki məntəqələri yaradılıb.
«Azərbaycanın xarici ölkə səfirliklərinin 33- də seçki məntəqələri yaradılıb və həmin məntəqələrin lazımi avadanlıqlarla təmin olunması başa çatdırılıb», - deyə cümə günü Trend News - a Mərkəzi Seçki Komissiyasının (MSK) beynəlxalq əlaqələr şöbəsinin müdiri Rövzət Qasımov məlumat verib.

Qasımovun sözlərinə görə, ABŞ, Rusiya, İran, Türkiyə, Avropanın bəzi ölkələrindəki səfirliklərdə yaradılmış seçki məntəqələrində 10 mindən çox azərbaycanlı seçicisinin səs verməsi gözlənilir. «Xaricdə yaşayan azərbaycanlılar üçün ayrılmış seçki bülletenləri və protokollar MSK tərəfindən Xarici İşlər Nazirliyinə təqdim olunub və yaxın günlərdə Nazirlik tərəfindən sənədlər səfirliklərə çatdıralacaq»,- deyə o bildirib.

Azərbaycanın Seçki Məcəlləsinə əsasən, hər hansı bir xarici ölkədə yaşayan Azərbaycan vətəndaşlarının sayı 50 - dən azdırsa, həmin ölkədə seçki məntəqəsi təşkil olunmur. /Trend/

Azərbaycan müxalifətini təmsil edən Müasir Müsavat Partiyasının sədri, prezidentliyə namizəd Hafiz Hacıyev bildirib ki, cümə günü bir qrup şəxs onunun rəhbərlik etdiyi siyasi təşkilatın mərkəzi qərərgahına hücum edib. «Mən İctimai Televiziyada çıxış edən zaman bir necə məmurun rüşvət almaqla məşğul olduqlarını vətəndaşlara çatdırıram. Bizim qərargaha hücum edən şəxsləri adını çəkdiyim məmurlar göndəriblər» - cümə günü Trend News-a Hacıyev bildirib. Onun sözlərinə görə, bir qrup şəxs partiyanın qərargahının yerləşdiyi əraziyə gəlib və icəri daxil olmağa cəhd göstəriblər. Lakin qərargahın qapıçısı onların içəri daxil olmasına imkan verməyib: «Onlar «Hafiz Hacıyevə ölüm!» şüarı səsləndiriblər və məqsədləri məni öldürməkdir. Bu barədə bəzi xarici ölkələrin səfirlərinə də məlumat vermişəm. Lakin mən mövqeyimdən geri çəkilən deyiləm». Prezidentliyə namizəd qeyd edib ki, hadisə ilə bağlı hüquq - mühafizə orqanlarına müraciət etməyi planlaşdırmır. O, bunu hüquq - mühafizə orqanlarına inanmaması ilə izah edib: «Öz adamlarımın hesabına təhlükəsizliyimi gücləndirmişəm». Müasir Müsavat Partiyası özünü iqtidara qarşı konstruktiv müxalifət hesab edir. /Trend/

Azərbaycan Respublikası prezidentinin İnternet saytında məktəblilər üçün newforkids.president.az. bölməsi açılıb.
Səhifə gənc məktəbli nəslin istifadəsi üçün rahat formatda yaradılıb.
Səhifədə məktəblilər üçün Azərbaycan dilində və onların başa düşə biləcəyi tərzdə Azərbaycan tarixi, coğrafiyası, siyasi sistemi, mədəniyyəti, dövlət rəmzləri, əsas nailiyyətləri və problemləri barədə informasiyalar yer alıb. Saytın digər bir bölməsi ümummilli lider Heydər Əliyevin fəaliyyətinə həsr olunub.

Saytın daimi qəhramanları olan üç gənc, gənclərə saytın xəritəsini izah edir və onlara əsas informasiyaları təqdim edirlər. Azərbaycan Respublikasının Konstitusiyası barədə informasiya ayrıca təqdim olunub. Burada Azərbaycan vətəndaşlarının əsas hüquq və azadlıqları öz əksini tapıb, hakimiyyətin bölüşdürülməsi məsələləri açıqlanıb və vətəndaşın Vətən qarşısında məsuliyyət tədbirləri müəyyən edilib.

«Mənim prezidentim» bölməsində Azərbaycan Respublikası prezidentinin fəaliyyəti geniş şəkildə açıqlanıb. Saytın gənc istifadəçilərinə prezident seçimi üzrə demokratik qaydalar və hakimiyyətin digər qolları barədə informasiya verilir. Saytda prezidentin şəxsiyyəti, gündəlik fəaliyyətinə dair məlumatlar həm mətn, həm də foto formatında geniş şəkildə öz əksini tapıb. Gənc nəslin nümayəndələri http://mektebli.president.az/ səhifəsi vasitəsilə ölkə, prezident və Azərbaycan Respublikasının gənc vətəndaşlarının şəxsiyyətinin formalaşmasına təsir göstərən əsas aspektlər barədə sərbəst şəkildə informasiya əldə edə bilərlər.

İnternetdə ABŞ, Rusiya, Pakistan, Fransa prezidentləri və Böyük Britaniya Baş nazirinin analoji səhifələri var.

Qeyd edək ki, Azərbaycan prezidentliyinə namizəd İlham Əliyevin İnternet-saytı - http://ilhamlaireli.az/ bu günlərdə işləməyə başlayıb. Orijinal tərtibatlı sayt öz dizaynı ilə diqqəti cəlb edib. Seçicilərə prezidentliyə namizədin fəaliyyəti haqqında tam məlumat təqdim edilib: regionlara səfərlər, çıxışlar, qəbullar. Eyni zamanda Azərbaycan, rus və ingilis dillərində informasiya təqdim edən sayt üçdilli formatda işləyir.

Prezidentliyə namizədin seçkiqabağı saytı istifadəçilərlə əks əlaqə təklif edir. Bunun köməyi ilə namizədin Seçki Qərargahına elektron məktub göndərmək mümkündür. /Trend/

Azərbaycanın hakim Yeni Azərbaycan Partiyası (YAP) müxalifətyönlü «Azadlıq» qəzetindən hakimiyyətin əleyhinə dezinformasiya və böhtan xarakterli məlumatlar yaymasına görə təkzib verməsini tələb edir. «Mətbuat Şurasının «Azadlıq» qəzetinə qarşı iradlarına baxmayaraq, həmin qəzetdə YAP-ın fəaliyyətini və hakimiyyətin siyasətini təhrif edən qərəzli məqalələrin dərci davam etdirilir», - deyə hakim partiyanın bəyanatında bildirilib.

Bəyanatda qeyd olunub ki, YAP-ın ictimai nüfuzuna xələl gətirmək niyyəti güdən təhqir, yalan və böhtanla yüklənmiş məqalələrin, şərəf və ləyaqəti alçaldan yazıların dərcinə görə partiya dəfələrlə Mətbuat Şurasına müraciət edib. Lakin qəzet hakim partiyaya qarşı qərəzli mövqeyini davam etdirir.

Hakim partiya qəzetin fəaliyyətini qətiyyətlə pisləyir və həmin qəzetin rəhbərliyindən Mətbuat Şurasının çıxardığı qərara müvafiq olaraq təkzib verməsini tələb edir: «YAP eyni zamanda, «Azadlıq» qəzetindən hakim partiyanın namizədinə böhtan atmaq məqsədilə qeydiyyatdan keçməyən «Seçki Monitorinq Mərkəzi»nin hesabatını təhrif etməklə dərc etməsi ilə əlaqədar təkzib verməsini və üzr istəməsini tələb edir. Əks təqdirdə, YAP həmin qəzetə qarşı qanun çərçivəsində daha ciddi addımlar atmaq məcburiyyətində qalacaq».

Bəyanatda bildirilib ki, YAP-ın müraciəti əsasında «Azadlıq» qəzetində dərc olunan böhtan xarakterli yazılarla bağlı Mətbuat Şurası 2008-ci il sentyabrın 19-da növbəti ictimai müzakirə keçirib və qurumun qərarı ilə həmin qəzetdə təkzib dərc olunması, yaxud üzr istənilməsi tələb olunub: «Adıçəkilən qəzet bütün bunlara məhəl qoymayaraq, YAP-a və hakimiyyətə qarşı qeyri-sağlam və etikadan kənar fəaliyyətini davam etdirir». /Trend/

Oktyabrın 15-də Azərbaycanda keçiriləcək prezident seçkiləri ilə bağlı Mərkəzi Seçki Komissiyasında (MSK) 574 beynəlxalq müşahidəçi qeydiyyatdan keçib. MSK-nın mətbuat xidmətindən APA-ya daxil olan məlumata görə, müşahidəçilərin qeydiyyatı səsverməyə 5 gün qalana kimi davam edəcək. MSK-da ATƏT-in Demokratik Təsisatlar və İnsan Haqları Bürosundan 274 nəfər, MDB Parlament Assambleyasından 3 nəfər, MDB Müşahidə Missiyasından 256 nəfər, Latviya MSK-dan 2 nəfər, Rusiya MSK-dan 3 nəfər, Ukrayna MSK-dan 4 nəfər, Beynəlxalq Respublikaçılar İnstitutundan 2 nəfər, Milli Demokratiya İnstitutundan 5 nəfər, İsrail və Fransa səfirliyinin hərəsindən 1 nəfər müşahidəçi kimi qeydiyyatdan keçib.