Yeni Azərbaycan Partiyası (YAP) tərəfindən namizədliyi irəli sürülmüş İlham Əliyevin seçki kampaniyası çərçivəsində oktyabrın 6-da ölkənin bir sıra şəhər, rayon və kəndlərində seçicilərlə görüşlər keçirilib. YAP-ın mətbuat xidmətindən APA-ya daxil olan məlumata görə, bu gün İ. Əliyevin vəkilləri, elm, mədəniyyət və ictimai xadimlərindən təşkil olunmuş təbliğat-təşviqat qrupunun üzvləri Biləsuvar, Qəbələ, Siyəzən, Ucar, Ağcabədi, Ağsu, Ağstafa, Qax, Xızı, Yasamal, Binəqədi, Nərimanov, Suraxanı, Qaradağ, Abşeron rayonlarında və Sumqayıt şəhərində mitinq-görüşlər keçiriblər. Mitinq-görüşlərdə İ. Əliyevin səlahiyyətli nümayəndəsi, YAP sədrinin müavini Əli Əhmədov, prezidentliyə namizədin vəkilləri - deputatlar Fəttah Heydərov, Mixail Zabelin, Mirkazım Kazımov, İmamverdi İsmayılov, Əhəd Abıyev, Rəbiyyət Aslanova, Ağacan Abıyev və digər şəxslər iştirak ediblər. /APA/

Prezidentliyə namizəd Qüdrət Həsənquliyev Goranboyda seçicilərlə görüş keçirib. Bütöv Azərbaycan Xalq Cəbhəsi Partiyasından (BAXCP) APA-ya verilən məlumata görə, Q. Həsənquliyev regionlarda insanların qarşılaşdığı gündəlik problemlərdən çıxış yolları, təhsil və səhiyyə sahəsində həyata keçirmək istədiyi yeniliklər barədə danışıb. O, prezident seçiləcəyi təqdirdə bölgələrdəki işsizlik probleminin həlli üçün zəruri addımların atılacağını söyləyib. Namizəd Dağlıq Qarabağ problemi və ordu quruculuğuna da toxunaraq hərbçilərin minimum əmək haqlarının 1000 manata çatdırılmasının, onların mənzil probleminin həlli üçün xüsusi dövlət proqramının hazırlanaraq həyata keçirilməsinin zəruriliyini vurğulayıb: “Orduya dövlət və ictimai nəzarət gücləndirilməli, Neft Fonduna toplanan vəsaitlərin 80 faizi müdafiə sənayesinin inkişafına və ölkənin müdafiə qabiliyyətinin gücləndirilməsinə yönəldilməlidir. Bununla yanaşı, peşəkar ordu quruculuğu prosesi tez bir zamanda həyata keçirilməli və hərbi xərclər büdcənin 25-27 faizinə çatdırılmalıdır”. Prezidentliyə namizəd sonda seçiciləri maraqlandıran suallara cavab verib. /APA/

ATƏT-in Demokratik Təsisatlar və İnsan Hüquqları Bürosunun Azərbaycanda seçkiləri missiyası ikinci hesabatını açıqlayıb.
APA-nın məlumatına görə, hesabatda bildirilir ki, ölkədə seçkiqabağı atmosfer sakitdir: “Seçkilərə ictimai maraq azdır, buna səbəb parlaq rəqabətin olmamasıdır. Seçkilər ərəfəsində yalnız Yeni Azərbaycan Partiyası aktiv kampaniya aparır. Digər namizədlər də təbliğat kampaniyası aparsa da, bu proses aktiv deyil”. Hesabatda qeyd olunub ki, paytaxt rəhbərliyi “Sərbəst toplaşmaq azadlığı haqqında qanun”u əsas gətirərək seçkiləri boykot edən müxalifət partiyalarına Bakının mərkəzində mitinq keçirməyə icazə verməyib: MSK seçkilərə aktiv şəkildə hazırlaşır. Mərkəzi Seçki Komissiyası seçki prosesini daha şəffaf təşkil etmək üçün veb-kameralar quraşdırmağı planlaşdırır. İctimai Televiziya ilə keçirilən mütəmadi debatlar bütün namizədlərə öz platformalarını təqdim etmək imkanı yaradır”. /APA/

Bu gün ATƏT-in müşahidə missiyasının üzvləri AVCİYA-nın Saatlı rayonundakı ofisində olmuş və Assosiasiyanın regional nümayəndəliyinin Prezident seçkiləri ilə bağlı fəaliyyəti ilə maraqlanmışlar. AVCİYA-nın ölkə üzrə bütün mətəqələrdə seçkiləri müşahidə edəcəyi və “ELS” təşkilatı ilə birlikdə 800 məntəqədə “exit- poll”, “quick- count” tədqiqatları aparacağı müşahidə missiyasının nəzərinə çatdırılıb. Qonaqlar həmçinin AVCİYA –nın nəşr etdirdiyi seçki materialları ilə də tanış olmuşlar.

Dünən Göyçayda Yeni Azərbaycan Partiyasının (YAP) prezidentliyə namizədi İlham Əliyevin vəkillərinin seçicilərlə görüşü keçirilib. APA-nın Aran bürosunun məlumatına görə, Göyçay şəhər stadionunda keçirilən görüşdə İlham Əliyevin vəkilləri - Milli Məclis üzvləri Şəmsəddin Hacıyev, Elton Məmmədov, Sabir Hacıyev və “İrəli” Gənclər Hərəkatının sədri Ceyhun Osmanlı iştirak edib. Görüşdən sonra incəsənət ustalarının iştirakı ilə konsert proqramı olub.

İlham Əliyevin vəkilləri Göyçay rayonunun bir sıra kəndlərində də seçicilərlə görüşüblər. /APA/

Milli Məclisin sədri Oqtay Əsədov ATƏT-in Seçkiləri müşahidə missiyasının rəhbəri Boris Frlesi qəbul edib. Parlamentin mətbuat xidmətindən APA-ya daxil olan məlumata görə, görüşdə O. Əsədov Avropa dəyərlərindən bəhrələnən Azərbaycanda qanunvericilik sistemin dünya standartları səviyyəsinə yüksəltmək üçün məqsədyönlü iş aparıldığını deyib. Spiker Azərbaycanda növbəti prezident seçkilərinin demokratik, şəffaf, ədalətli keçirilməsi üçün müvafiq işlərin görüldüyünü, Seçki Məcəlləsinə və “Sərbəst toplaşmaq azadlığı haqqında” qanuna dəyişikliklər edildiyini bildirib.

B. Frles Seçki Məcəlləsinə və “Sərbəst toplaşmaq azadlığı haqqında” qanuna edilmiş dəyişiklikləri müsbət dəyərləndirib: “Azərbaycanın bugünkü qanunvericilik bazası prezident seçkilərinin demokratik keçirilməsinə hər cür imkan verir”. O, ümidvar olduğunu bildirib ki, Azərbaycandakı prezident seçkiləri azad, şəffaf və demokratik şəraitdə keçiriləcək. /APA/

Oktyabrın 5-də Böyük Quruluş Partiyasından prezidentliyə namizəd Fazil Mustafayev Şirvanda seçicilərlə görüş keçirib. APA-nın Mil-Muğan bürosunun məlumatına görə, görüşdə Fazil Mustafayev seçicilərə seçki platforması barədə məlumat verib, onların suallarını cavablandırıb.

Namizədin çıxışı, əsasən, Azərbaycanın neft ölkəsindən rifah ölkəsinə çevrilməsi ruhunda olub. Görüşü ATƏT nümayəndələri də müşahidə edib. /APA/

Oktyabrın 15-də keçiriləcək prezident seçkilərində müşahidə aparmaq məqsədi ilə Mərkəzi Seçki Komissiyasına (MSK) müraciət üçün müəyyən edilmiş müddət başa çatıb. Bu barədə APA-ya MSK-nın mətbuat xidmətinin rəhbəri Azər Sarıyev məlumat verib. Onun sözlərinə görə, MSK-nın qəbul etdiyi Təqvim Planına görə, müşahidəçilərin qeydiyyatı səsverməyə 10 gün qalana kimi davam edir. MSK-da qeydiyyatdan keçən şəxslər ölkə ərazisində istənilən seçki dairəsində və seçki məntəqəsində müşahidə aparmaq hüququna malikdirlər. A. Sarıyev bildirib ki, MSK-ya müraciət edən yerli və xarici müşahidəçilərin hamısının müraciətinə baxılmadığından yekun nəticə hələlik bəlli deyil. Sonuncu hesablamaya görə mindən çox şəxs MSK-da qeydiyyatdan keçib.

A. Sarıyev Dairə Seçki Komissiyalarında müşahidəçilərin qeydə alınmasının səsverməyə 5 gün qalana kimi davam edəcəyini bildirib. /APA/

Ukraynanın Azərbaycandakı fövqəladə və səlahiyyətli səfiri Boris Klimçuk bu gün Mərkəzi Seçki Komissiyasının (MSK) sədri Məzahir Pənahovla görüş keçirib. MSK-nın mətbuat xidmətindən APA-ya daxil olan məlumata görə, səfir oktyabrın 15-də keçiriləcək prezident seçkilərinə hazırlıq vəziyyəti ilə maraqlanıb. MSK sədri isə seçkilərə hazırlıqla bağlı həyata keçirilən tədbirlər, seçki komissiyalarının fəaliyyət prinsipləri və s. vacib seçki məsələləri barədə məlumat verib. Görüşdə həmçinin, Azərbaycan və Ukrayna MSK-ları arasında əməkdaşlıq barədə memorandumun imzalandığı qeyd olunub və komissiyaların altı ildir ki, bu sənədə uyğun olaraq təcrübə mübadiləsi apardıqları bildirilib. /APA/

Prezidentliyə namizəd Qüdrət Həsənquliyevin APA-ya müsahibəsi

- Təbliğat kampaniyası necə gedir?

- Kampaniya normal gedir. Lakin bizim təbliğat imkanlarımız iqtidar nümayəndəsi ilə müqayisədə məhduddur. Azərbaycan dövlət televiziyası hazırda Seçki Məcəlləsini pozaraq, yalnız prezidentin təbliğatı ilə məşğul olur. Düzdür, Seçki Məcəlləsində qeyd olunub ki, prezident kampaniya dövründə öz səlahiyyətlərini davam etdirir, deməli, onun prezident kimi fəaliyyəti də işıqlandırılmalıdır. Amma dövlət televiziyası hazırda sırf təbliğatla məşğul olur. Mən və daha bir neçə prezidentliyə namizəd də parlamentdə deputat kimi çıxış edirik, amma dövlət televiziyası bizimlə bağlı adi bir görüntü belə vermir.

Həmçinin, məqsədyönlü şəkildə parlamentdəki iqtidar çoxluğu Mərkəzi Seçki Komissiyasını formalaşdırmadı. Mən bu məsələni Milli Məclisdə də qaldırdım, qanunda da əks olunub ki, azlıqda qalan partiyalar MSK-ya 6 nümayəndə təyin edə bilər. Bir nəfər isə bitərəflərin nümayəndəsi kimi razılaşdırılır. Lakin bu heç də belə olmadı, iki yer boş saxlanıldı. Milli Məclisin birinci vitse-spikeri Ziyafət Əsgərov isə ictimaiyyətə yanlış informasiya verərək, guya bizim öz aramızda razılaşa bilmədiyimizi söyləyir. Halbuki, digər 4 yerə üzv təyin olunanda da hər hansı razılaşma əldə olunmamışdı.

Başqa bir nöqsan isə İctimai Televiziyada bizə ayrılan pullu efir vaxtı ilə bağlıdır. Qanunda göstərilib ki, pullu efir vaxtı pulsuz efir vaxtı qədər və ya ondan iki dəfə çox ola bilər. Bizdə isə 4 namizədə 5 dəqiqəlik efir vaxtı ayrılır.

Digər televiziyalar isə seçki təbliğatı prosesində ümumiyyətlə iştirak etmirlər. Yalnız ANS bu prosesə qoşulub. Bu televiziya isə yalnız reklam çarxları yayımlayır, çıxış üçün efir vaxtı ayırmır.

- Yerlərdə təbliğat kampaniyasının aparılması üçün şərait necədir? Məsələn, plakatlar cırılırmı və ya seçicilərlə görüş üçün yerlər ayrılırmı?

- Kütləvi olaraq, plakat cırılması halı yoxdur. Sadəcə, bir-iki yerdə xuliqanlıq faktı kimi belə hallar qeydə alına bilər. Amma bu çox epizodikdir. Seçicilərlə görüşlər üçün də normal şərait var. Daha doğrusu, bu şərait yerlərə görə dəyişir. Məsələn, mənim Qusar və Xaçmazda seçicilərlə görüşüm üçün rayon mərkəzlərində çox gözəl yerlər ayrılmışdı. Göyçayda da zalın vəziyyəti yaxşı idi, amma mərkəzdən uzaqda idi. Lənkəranda isə həm yer bərbad idi, həm də çox uzaq idi. Lənkəranda görüşün baş tutmamasına da çalışıldı. Amma digər rayonlarda belə hallar olmayıb.

- Seçki kampaniyası dövründə paytaxtda mitinq keçirməyi planlaşdırırsınızmı?

- Bəli, hava şəraitindən asılı olaraq, ya mitinq, ya da qapalı görüş keçirməyi nəzərdə tuturuq. Artıq görüş keçirmək üçün müraciət də etmişik. Müraciətdə Opera və Balet Teatrının binasını istəmişik.

- Bu seçki kampaniyası ilə bağlı ölkədə çox fərqli fikirlər var. Kampaniyanın sakit keçməsi əsas müzakirə mövzularından biridir. Necə hesab edirsiniz, seçki belə olmalıdır, yoxsa daha böyük hay-küyə ehtiyac var?

- Bu mülahizələrin ortaya çıxmasının çox səbəbi var. Əvvəla, bu seçkiyə elektron informasiya vasitələrinin ayırdığı vaxt çox azdır. Bu KİV-lərin seçki təbliğatdakı rolu çox zəifdir. Müxalifətdən olan namizədlərin efir imkanları isə xeyli məhduddur. İkincisi, hər seçkidə ölkənin seçki sivilizasiyasına uyğunlaşması bir az daha artır. Yəni, sözü qışqıra-qışqıra deyil, sakit tərzdə, real formada deməyi öyrənənlərin sayı artır.

Məsələn, mən bizim partiyadan başqa öz platformasını ortaya qoyan ikinci namizədə rast gəlmirəm. Bəzi namizədlər yalnız sual verir, olan problemləri sadalayırlar, YAP-dan olan vəkillər isə ancaq tənqidlərə cavab verir və görülmüş işlərdən danışırlar. Bizdən başqa, ölkədəki mövcud problemlərin köklü, fundamental həlli yolları ilə bağlı ortaya variant qoyan ikinci partiya yoxdur. Bizim platformamızda Konstitusiya, səhiyyə və təhsil islahatları, Dağlıq Qarabağ problemi, iqtisadi sahə ilə bağlı bütün görüşlər öz əksini tapıb. Məsələn, biz deyirik ki, yanvar ayının birindən pensiyaçılar 500, müəllimlər və həkimlər 600 manat alacaq. Hər yeni doğulan uşağa görə, ailələrə 5000 manat veriləcək. Biz deyirik ki, regionların inkişafı üçün yaradılacaq istehsal və emal müəssisələri 2 il vergidən azad olunacaq. Bu gün regionlarda tikilən idman kompleksləri və diaqnostika mərkəzləri üçün dövlət büdcəsindən 1 manat belə sərf olunmayacaq. Biz bu işləri müsabiqə yolu ilə həll edəcəyik. Bu, bizim platformamızın bir hissəsidir və əgər seçicilər bizim dediyimiz prizmadan buna yanaşsalar, inanıram ki, bizə səs verəcəklər.

- Namizədliyinizi kiminsə xeyrinə geri götürmək fikriniz yoxdur ki?

- Xeyr, sona qədər mübarizə aparacağam. /APA/

Avropa İttifaqının (Aİ) Cənubi Qafqaz üzrə xüsusi nümayəndəsi Piter SemnebiAzərbaycandakı seçkiqabağı vəziyyəti öyrənir.
Bazar ertəsi Aİ xüsusi nümayəndəsinin Azərbaycanın rəsmi şəxsləri, siyasi partiyalar və vətəndaş cəmiyyətinin nümayəndələri ilə görüşləri başlayıb.
Semnebinin seçkiqabağı vəziyyətlə tanış olması üçün Azərbaycan XİN və MSK-da görüşləri planlaşdırılıb. /Trend/

Azərbaycanın müxalif Milli İstiqlal Partiyası (AMİP) prezident seçkilərində namizədi ilə iştirak etməsə də, səsvermə prosesini müşahidə edəcək. Bu məlumatı Trend News-a bazar ertəsi AMİP-in mətbuat və təbliğat katibi Əli Orucov verib.

«Seçkiləri müşahidə etmək üçün bir müddət əvvəl rayon təşkilatlarına müvafiq dairələrdə qeydiyyatdan keçmək üçün tapşırıq verilib. Son məlumatlara görə, artıq partiya ölkə üzrə seçki dairələrinin 90 faizindən çoxunda müşahidə imkanı qazanıb», - Orucov bildirib.

AMİP funksionerinin sözlərinə görə, seçkilərdə müşahidəçi qismində iştirak etməklə həm seçki prosesini yaxından izləmək, həm də yol veriləcək qanunsuzluqlar barədə daha ətraflı məlumat toplamaq imkanı qazanacaqlar. /Trend/