Azərbaycanın Mərkəzi Seçki Komissiyası (MSK) bu gün keçirilən iclasında prezidentliyə iki namizədin vəkillərini qeydə alıb.
Müxalifəti təmsil edən Müasir Müsavat Partiyasının prezidentliyə namizədi Hafiz Hacıyevin 40, Azərbaycan Liberal Demokrat Partiyasının prezidentliyə namizədi Fuad Əliyevin 30 vəkili qeydə alınıb.

İclasda MSK sədri Məzahir Pənahov bildirib ki, prezident seçkisini izləmək üçün seçki komissiyaları tərəfindən indiyədək 25 023 müşahidəçi qeydə alınıb; 15 087 nəfər siyasi partiyalar, 7726 nəfər QHT nümayəndələri, 2310 müşahidəçi isə öz təşəbbüsü ilə prezident seçkisini izləyəcək», - deyə Pənahov bildirib.

Mərkəzi Seçki Komissiyasında müşahidəçilərin qeydiyyatı səsvermə gününə 10 gün, dairə seçki komissiyalarında isə, 5 gün qalmış başa çatır. /Trend/

Müstəqil Dövlətlər Birliyinin (MDB) Azərbaycandakı seçkiləri müşahidə missiyasının qərargah üzvləri Azərbaycan Liberal-Demokrat Partiyasından prezidentliyə namizəd Fuad Əliyev və onun vəkili ilə görüşüblər. Missiyanın mətbuat xidmətindən APA-ya verilən məlumata görə, görüşdə F. Əliyevin seçki kampaniyasında iştirakı ilə bağlı məsələlər müzakirə olunub.

Bu gün müşahidəçilər Müasir Müsavat Partiyasından prezidentliyə namizəd Hafiz Hacıyev və onun vəkili ilə də görüşəcəklər. Sabah isə onlar Şamaxı, İsmayıllı, Qəbələ və Şəki rayonlarına gedəcək, orada seçkilərə hazırlıq və seçki kampaniyasının gedişi ilə tanış olacaqlar. /APA/

“Bəzi prezidentliyə namizədlər canlı efirdə Seçki Məcəlləsinin 88-ci maddəsinə zidd olan təhqirlər səsləndirir. Müdaxilə səlahiyyəti olmasa da, verilişin aparıcısı dəfələrlə belə hallara yol verilməməsi haqda həmin namizədlərə xəbərdarlıq edib”. Bu açıqlamanı APA-ya İctimai Televiziya və Radio Yayımları Şirkətinin (İTV) baş direktoru İsmayıl Ömərov verib. Baş direktor bu halın aradan qaldırılacağına inandığını bildirib. İ. Ömərov deyib ki, qanuna əsasən efirdə səslənən fikirlərə görə İTV məsuliyyət daşımır.

Namizədlərin iştirakı ilə təşkil olunan debatların efir vaxtı ilə bağlı səslənən narazılıqlara gəlincə, İ. Ömərov bu vaxtın namizədlərin səlahiyyətli nümayəndələrinin iştirakı ilə keçirilən müzakirələr nəticəsində MSK-nın müəyyənləşdirdiyini deyib: “Biz istənilən efir vaxtını ayırmağa hazır olduğumuzu bildirmişik. Sadəcə özlərinin iştirakı ilə MSK bu qərarı qəbul etdi. Bu kollegial qərarı daha heç kəs poza bilməz. Yeri gəlmişkən 18.50-dən 19.50-dək olan vaxt İctimai televiziyada diskusiya saatı kimi auditoriyaya çoxdan bəllidir”.

Seçkini boykot edən qüvvələrə efir vaxtının verilməsinə gəlincə, baş direktor deyib ki, “biz onların bütün tədbirlərini həmişə olduğu kimi dolğun şəkildə işıqlandırmağa hazırıq. Amma boykot üçün xüsusi efir vaxtının ayrılması 7 nəfər prezidentliyə namizədin hüququn və qanunvericiliyin pozulması demək olardı”./APA/

“Azad, Şəffaf, Ədalətli Seçkilər” QHT Koalisiyası 2008-ci il prezident seçkiləri ilə bağlı təbliğat-təşviqat kampaniyası zamanı aparılan monitorinqin nəticələrini açıqlayıb. Koalisiyanın mətbuat xidmətindən APA-ya daxil olan məlumata görə, sentyabrın 7-dən 24-dək aparılan monitorinqin nəticələrinə görə, seçki ilə bağlı mətbuatda dərc olunan materialların azlığı diqqəti cəlb edib. Bu isə prezidentliyə namizədlərin çap mediasına maraqlarının az olması ilə əlaqələndirilib. 6 gündəlik qəzetdə aparılan monitorinqə görə, qeyd olunan müddət ərzində ümumilikdə 141 material dərc edilib. Monitorinq zamanı məlum olub ki, rusdilli qəzetlər daha çox analitik materiallara, Azərbaycan dilli qəzetlər isə əhəmiyyət dərəcəsindən asılı olmayaraq informasiya yaymağa üstünlük verir. Mətbuatda dərc edilən seçki ilə bağlı yazıların 74-ü birbaşa namizədlərin özü ilə bağlı olub. İlham Əliyev haqda 29, İqbal Ağazadə haqda 18, Qüdrət Həsənquliyev haqda 12, Qulamhüseyn Əlibəyli haqda 7, Hafiz Hacıyev haqda 5, Fazil Qəzənfəroğlu haqda 2, Fuad Əliyev haqda 1 yazı dərc edilib. Yazıların bir hissəsi namizədlərin lehinə, digər hissəsi isə əleyhinə olub. Koalisiyanın hesabatında təbliğat-təşviqat kampaniyasının bir hissəsinin geridə qalmasına baxmayaraq, hələ də namizədlərin geniş təbliğatı və platformasına rast gəlinmədiyin bildirilir. /APA/

Mərkəzi Seçki Komissiyasının (MSK) nəzdində mətbuat qrupunun bu gün keçirilən iclasında Ümid Partiyasının müraciətlərinə baxılıb. APA-nın məlumatına görə, qrupun sədri Azər Tağıyev bildirib ki, Ümid Partiyası müraciətində bildirib ki, Yeni Azərbaycan Partiyasının MSK-dakı məşvərətçi səs hüquqlu üzvü Aydın Mirzəzadə qurumun qəbul etdiyi təlimata zidd olaraq İctimai Radioda təbliğat çıxışı edib. Qrupun üzvü Fuad Cavadov isə bildirib ki, A. Mirzədadə MSK-da məşvərətçi səs hüquqlu üzv olmaqla bərabər, həm də YAP-ın namizədi İlham Əliyevin vəkilidir. Digər tərəfdən o Seçki Məcəlləsində məşvərətçi səs hüquqlu üzvün təbliğat aparmasının qadağan olunmadığını qeyd edib: “Yalnız həlledici səs hüquqlu üzvlərin təbliğat aparması qadağan edilir”. Qrupun üzvü Almas Qəhrəmanov isə bildirib ki, namizədin 50 vəkili olduğu halda məşvərətçi səs hüquqlu üzvün təbliğat aparmasına ehtiyac yoxdur. Ümid Partiyasının prezidentliyə namizədinin səlahiyyətli nümayəndəsi Nəsimi Məmmədli isə bu addımın presedent yaradacağını və sonrakı mərhələlərdə digər bu hüquqlu şəxslərin də aktiv olaraq təbliğat kampaniyasına qoşulacağını qeyd edilib. İclasda həmçinin, Ümid Partiyasının Müasir Müsavat Partiyası ilə bağlı müraciətinə baxılıb. Müraciətdə partiyanın MSK-dakı məşvərətçi səs hüquqlu üzvü Faiq Baxşəliyevin İTV rəhbərliyini aldadaraq özünü səlahiyyətli nümayəndə kimi təqdim etdiyini və çıxış etdiyi bildirilib. İclasda iştirak edən F. Baxşəliyev bildirib ki, müraciətdə qeyd olunanlar həqiqətə uyğun deyil: “Mən İTV-də məşvərətçi səs hüquqlu vəsiqəsini təqdim etmişəm”. Ümid Partiyasının hər iki müraciəti əsassız hesab edilib. Mətbuat qrupunun üzvləri Almas Qəhrəmanlı və Məhəbbət Orucov isə MMP-nin namizədi Hafiz Hacıyevin televiziyada efirə yaraşmayan çıxışlar etdiyini, təhqirlər səsləndirdiyini bildirərək bu məsələnin qiymətləndirilməsini xahiş ediblər. A. Tağıyev İTV rəhbərliyindən H. Hacıyevin çıxışlarını MSK-ya təqdim etməsini istəyib. Növbəti iclasda namizədin çıxışlarına baxılacaq və qiymətləndiriləcək. /APA/

Mərkəzi Seçki Komissiyası (MSK) prezidentləri namizəd, Azərbaycan Liberal Demokrat Partiyasının (ALDP) sədri Fuad Əliyevə müraciət edib. APA-nın məlumatına görə, bu barədə qurumun mətbuat xidmətinin rəhbəri Azər Sarıyev məlumat verib. Onun sözlərinə görə, F. Əliyev təşviqat şəkillərində rekvizitləri göstərməyib. A. Sarıyev bildirib ki, bu qanunun müddəalarına ziddir və müraciətdən sonra F. Əliyevin həmin şəkilləri öz partiyası tərəfindən təbliğat lövhələrindən yığışdırılır, onun yerinə isə rekvizitlər göstərilən yeni şəkillər yapışdırılır. A. Sarıyevin sözlərinə görə, prezidentliyə namizədlər çap etdirdikləri bütün təşviqat materiallarının bir nüsxəsini MSK-ya təqdim edirlər. O seçkiyə qatılmış 7 namizədin 6-nın artıq bu materialları quruma təqdim etdiyini bildirib. Yalnız Qulamhüseyn Əlibəyli hələlik heç bir təşviqat materialı çap etməyib. /APA/

Azərbaycanın «Seçki 2008» QHT koalisiyası 1500 nəfər müşahidəçi ilə prezident seçkisini izləyəcək. Koalisiyadan cümə günü Trend News- a verilən məlumata əsasən, müşahidəçilər 60 seçki dairəsində müşahidə aparacaq.

«Seçki 2008» QHT Koalisiyası prezident seçkilərində ictimai fəallığın artırılması məqsədi ilə bu ilin avqustunda yaradılıb. Koalisiya «İnam» Plüralizm Mərkəzi, Multimedia İnformasiyalar Sistemi və Texnologiyaları Mərkəzi, Beynəlxalq Avrasiya Mətbuat Fondu, Mətbuat Şurası İdarə Heyətinin üzvü Umud Rəhimoğlu və KASKFEN-nin sədri Azər Həsrət tərəfindən təsis edilib.

Koalisiyanın müşahidə aparacağı seçki dairələri Azərbaycanın altı bölgəsini - Qarabağ, Aran, Gəncəbasar, Şimal, Cənub və Bakını əhatə edəcək.

Koalisiyanın prezident seçkisilə bağlı ilkin rəyi oktyabrın 16 - da açıqlanacaq.

Məlumatda o da bildirilib ki, «Seçki 2008» QHT Koalisiyasının üzvləri seçkiöncəsi vəziyyətlə tanış olmaq üçün Bərdə, Goranboy, Gəncə, Tovuz və Qazaxa səfər ediblər. Koalisiya üzvləri seçki məntəqələrində seçici siyahıları ilə tanış olublar. Bəzi qaçqın düşərgələrinə yaxın məntəqələrdə siyahıların dəqiqləşdirilməsi prosesində problemlər üzə çıxarılıb. /Trend/

Azərbaycanda keçiriləcək prezident seçkisində istifadə olunacaq gözlə görünməyən mürəkkəb, əlavə şəffaf seçki qutuları və ultra-bənövşəyi detektorlar (lampalar) Danimarkadan Azərbaycana gətirilib.

«Artıq seçki ləvazimatlarının Dairə və Məntəqə seçki komissiyalarına paylanmasına başlanılıb», cümə günü Trend News-a Azərbaycan Mərkəzi Seçki Komissiyasının (MSK) Beynəlxalq əlaqələr şöbəsinin müdiri Rövzət Qasımov bildirib.

Azərbaycana ilk şəffaf seçki qutuları 2003-cü il prezident seçkisində gətirilib və tətbiq olunub.

Azərbaycanda 5 000-dən artıq seçki məntəqəsi fəaliyyət göstərir. Hər məntəqəyə bir daşınan və daşınmaz şəffaf qutu qoyulur.

Qasımov qeyd edib ki, seçicilərin sayından asılı olaraq hər seçki məntəqəsinə 1, 2 və 3 gözlə görünməyən mürəkkəb balonu veriləcək.

Onun sözlərinə görə, Azərbaycana şəffaf seçki qutuları və ultra-bənövşəyi detektorlar 2005-ci ilin parlament seçkisi dövründə gətirilib: «Bu il gətirilənlər əlavədir». /Trend/

Azərbaycan qadınları qarşıdakı prezident seçkisində hazırkı dövlət başçısı İlham Əliyevin namizədliyini dəstəkləyəcəklər. Bu barədə cümə günü Azərbaycan qadınlarının III qurultayında Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib.

Hüseynovanın sözlərinə görə, Azərbaycan qadınları ictimai-sosial stabilliyin təminatı, iqtisadiyyatın sürətli inkişafı və sosial problemlərin həlli mövqeyindən çıxış edirlər.

«Azərbaycan qadınları seçkidə Azərbaycanın beynəlxalq nüfuzunun möhkəmləndirilməsinə istiqamətlənən siyasi kursu dəstəkləyəcəklər», - deyə o bildirib.

Hüseynovanın sözlərinə görə, seçki günü bütün seçicilərin yarıdan çoxunu təşkil edən qadın seçicilər siyasi fəallıq göstərəcəklər. /Trend/

Azərbaycanın prezidentliyə namizədi, Böyük Quruluş Partiyasının (BQP) sədri Fazil Qəzənfəroğlu təbliğat-təşviqat kampaniyası çərçivəsində sentyabrın 28-də (paytaxt Bakıdan 365 kilometr qərbdə) Gəncədə seçicilərlə görüş keçirəcək. Bu barədə cümə günü Trend News-a Gəncə şəhər İcra Hakimiyyətinin İçtimai təşkilatlar və siyasi partiyalarla iş şöbəsinin müdiri Ruslan Qardaşov məlumat verib.

Qardaşovun bildirdiyinə görə, Qəzənfəroğlunun Gəncədə görüş keçirməsi üçün artıq yer müəyyən olunub. Prezidentliyə namizəd Gəncənin Füzuli parkında yerləşən qapalı yerdə görüş keçirəcək. Seçicilərlə görüşün təhlükəsizliyi üçün hər bir şərait yaradılıb.

Onun bildirdiyinə görə, ümumilikdə Gəncədə namizədlərin görüş keçirmələri üçün 80 yer ayrılıb ki, onlardan da 42-si qapalı, 38-i isə açıq şəraitdədir. /Trend/

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Prezident seçkiləri ərəfəsi Respublikanın 12 regional mərkəzində müşahidəçilərə treninqlər başa vurduqdan sonra seçki maarifçiliyi ilə bağlı yeni layihənin icrasına başlayıb.
Bu gün assosiasiyanın üzvləri Sumqayıt Dövlət Universitetində seminar keçirdi. 100-dən artıq tələbə və müəllimin qatıldığı seminarda Venesiya komissiyasının tövsiyələri, Seçki Məcəlləsinə edilən dəyişiklər, seçici fəallığının artırılması yolları, seçkilərin ədalətli və şəffaf keçirilməsində maarifçilik işinin əhəmiyyəti, müşahidəçilərin hüquq və vəzifələri, “exit-poll”, “quick-count” tədqiqatları və s. məsələlər müzakirə olunmuşdur. Tədbirdə AVCİYA Seçki Qərargahının rəhbəri Məhərəm Zülfüqarlı, AVCİYA-nın təmsilçiləri Ramil Qasımzadə və Osman Ağayev çıxış edərək seminar iştirakçılarının suallarına cavab vermişlər.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyilə AVCİYA «Prezident və bələdiyyə seçkilərində seçici fəallığının artırılması, seçkilərin ədalətli və şəffaf keçirilməsinə kömək məqsədilə maarifçilik işinin təşkili» mövzusunda regionlarda tədbirləri davam etdirir.

Azərbaycan Sosial Demokrat Partiyası (ASDP) Mərkəzi Komitəsi Bürosunun sabiq üzvü, partiyanın keçmiş ideologiya katibi Elşən Manafov Azərbaycan Demokratik Sol Partiyasının (ADSP) Təşəbbüs Qrupunu yaradıb. Bu barədə APA-ya E. Manafov məlumat verib. O bildirib ki, prezident seçkisindən sonra təşkilat komitəsi formalaşdırılacaq: “Partiyanın proqramı üzərində iş gedir. Çalışırıq ki, partiyanın sənədlərində beynəlxalq təcrübə nəzərə alınsın”. E. Manafovun sözlərinə görə, Təşəbbüs Qrupunda ASDP üzvləri də var: “ASDP-yə mənə görə üzv olanlar bu partiyanı tərk edəcəklər”. E. Manafov digər sol təmayüllü partiyalarla danışıqlar apardıqlarını da söyləyib: “Danışıqlar apardığım partiyalar arasında iqtidaryönümlü partiyaların toplaşdığı Məşvərət Məclisində təmsil olunan qurumlar da var”./APA/