Mərkəzi Seçki Komissiyasının (MSK) növbəti iclası keçirilib. APA-nın məlumatına görə, iclasda daha iki nəfərin prezidentliyə namizədliyinin təsdiq olunması ilə bağlı məsələyə baxılıb.

İclasda Böyük Quruluş Partiyası tərəfindən prezidentliyə namizədliyi irəli sürülən Fazil Mustafayevin (Qəzənfəloğlu) və namizədliyi özü tərəfindən irəli sürülən Fikrət Tağı oğlu Əhədovun prezidentliyə namizədliyi təsdiq olunub.

Avqustun 25-26-da Mərkəzi Seçki Komissiyası (MSK), Avropa Şurasının Venesiya Komissiyası və Seçki Sistemləri üzrə Beynəlxalq Fond ilə birlikdə dairə seçki komissiyalarının ərizə və şikayətlərinə baxılmasına məsul olan əməkdaşları üçün “Ərizə və şikayətlərə baxılması qaydaları”na dair treninqlər keçirəcək. Bu barədə APA-ya MSK_dan bildirilib.

Azərbaycanda müxalifətin yeni əməkdaşlıq formatında seçkidə iştirakdan imtina edən bütün partiyaların təmsilçiliyi baş tutmayıb. «Danışıqların ilk mərhələsi başa çatmaq üzrədir və hazırda konkret olaraq Azərbaycan Milli İstiqlal Partiyası (AMİP) və Azərbaycan Demokrat Partiyası (ADP) bu danışıqlarda iştirakdan imtina ediblər. Bundan başqa, Vətəndaş Həmrəyliyi və Azərbaycan Sosial Demokrat partiyaları isə ümumiyyətlə, danışıqlara cəlb olunmayıb», bazar ertəsi Trend News-a Azərbaycan Xalq Cəbhəsi Partiyasının (AXCP) sədr müavini Fuad Mustafayev bildirib.

Azərbaycanın müxalif Böyük Quruluş Partiyasının (BQP) prezidentliyə namizədi seçkidə iştirakdan imtina edən əsas müxalifət partiyalarının elektoratının səsini qazanacağına ümid edir.

«Seçkidə iştirak etməyən müxalifət partiyalarının elektoratının səsini qazanmaq istiqamətində mənim ciddi addımlarım olacaq», bazar ertəsi Trend News-a BQP başqanı, millət vəkili Fazil Qəzənfəroğlu bildirib.

Mərkəzi Seçki Komissiyası (MSK) Avropa Şurasının Venesiya Komissiyası və Seçki Sistemləri üzrə Beynəlxalq Fond (İFES) birgə Dairə Seçki Komissiyalarının (DSK) katibliklərinin ərizə və şikayətlərə baxılmasına məsul olan əməkdaşları üçün “Ərizə və şikayətlərə baxılması qaydaları” mövzusunda treninqi davam etdirib.

Müxalif Azərbaycan Milli Demokrat Partiyasının (AMDP) bazar günü keçirilən növbədənkənar IV qurultayında yeni sədr seçilib. Trend News-un məlumatına əsasən, AMDP-nin sədrliyinə yeganə namizəd Böyük Məclis sədri Tufan Kərimli səs çoxluğu ilə partiyanın sədri seçilib.

AMDP-nin keçmiş sədri İsgəndər Həmidov qurultaya dəvət olunsa da, tədbirə qatılmayıb.

Azərbaycan parlamentində müxalifəti təmsil edən Müsavat deputat qrupu «Sərbəst toplaşmaq azadlığı haqqında» qanuna yenidən əlavə və dəyişikliklər edilməsi ilə bağlı layihə hazırlayıb.

«Layihə kütləvi aksiyaların keçirilməsi üçün yerlərin ayrılmasına qoyulan məhdudiyyətin «Sərbəst toplaşmaq azadlığı haqqında» qanundan çıxarılmasını nəzərdə tutur», cümə günü Trend News-a Müsavat deputat qrupunun üzvü Pənah Hüseyn bildirib.

Azərbaycanda keçiriləcək prezident seçkilərində Almaniya Federativ Respublikasının birbaşa müşahidəçiləri iştirak etməyəcək. «ATƏT üzvü kimi Almaniyanın müşahidəçiləri ATƏT-in xətti ilə gələcək», - deyə Almaniyanın Azərbaycandakı səfiri Per Kristofer Stankina Trend News-a bildirib.

Seçkiləri ATƏT-in 30 uzunmüddətli və 450 qısamüddətli müşahidəçisi izləyəcək.

Prezident seçkiləri ilə bağlı Xəzər dənizinin Azərbaycana məxsus sektorunda yerləşən neft platformalarında, səsvermə günü üzən gəmilərdə seçki məntəqələri yaradılacaq. Bu barədə şənbə günü Trend News-a MSK-dan məlumat verilib.

Azərbaycanın müxalif Xalq Cəbhəsi Partiyası (AXCP) Ali Məclisinin sədri Qulamhüseyn Əibəyli özünün seçki qərargahını formalaşdırıb. «Qərargaha Demokratik Seçki Mərkəzinin sədri Qorxmaz İbrahimli sədrlik edir», cümə günü Trend News-a Əlibəyli özü məlumat verib.

Müxalif Azərbaycan Milli Demokrat Partiyasının (AMDP) növbədənkənar IV qurultayının vaxtı müəyyən olunub. Partiyanın qurultaya hazırlıq üzrə Təşkilat Komitəsinin sədri Oqtay Xəlillinin cümə günü Trend News-a bildirdiyinə görə, AMDP-nin qurultayı avqustun 24 - də «Bakı» kino-teatrında keçiriləcək.

ATƏT Azərbaycanda keçiriləcək prezident seçkilərinin gedişini izləmək üçün yerli müşahidəçiləri toplayır.
“Missiya 2008-ci il avqustun 20-dən noyabrın 1-dək fəaliyyət göstərəcək. Əsas tələblər ali təhsilin və paralel sahələrdə ən azı iki il iş təcrübəsinin olmasıdır”, - cümə günü ATƏT-in Bakı ofisindən bildiriblər.